ەكس-مينيستر قۋاندىق بيشىمبايەۆ پەن ونىڭ تۋىسى باقىتجان بايجانوۆقا قاتىستى سوت تەرگەۋى اياقتالدى. كەشەگى سوت وتىرىسىندا ولار ءوز ۇستانىمدارىن ايتتى، - دەپ حابارلايدى Dalanews.kz.
سۋديا ايجان قۇلبايەۆا بيشىمبايەۆقا باستى سوت وتىرىسىندا پروكۋرور ايىپتاۋ اكتىسىن وقىپ، ايىپ تاعىپ، تاعىلعان ايىپتار بويىنشا ءوز ۇستانىمىن ناقتىلاعاندا، ەكى باپ بويىنشا دا كىناسىن تولىق مويىنداماعانىن ەسكە سالدى.
"ەندى سوت تەرگەۋى اياقتالعاننان كەيىن ءسىزدىڭ جاۋاپتارىڭىز تىڭدالىپ، كۋاگەرلەردەن جاۋاپ الىنىپ، اۋديو-ۆيدەو جازبالار قارالىپ، قىلمىستىق ءىس ماتەريالدارى زەرتتەلىپ بولعاننان كەيىن ءسىزدىڭ ۇستانىمىڭىز بۇرىنعىداي قالا ما؟" - دەپ سۇرادى سۋديا.
"تورەشى، قۇرمەتتى القابيلەر، مەن ازاپتاۋ بويىنشا ءوز كىنامدى مويىندامايمىن"، - دەپ جاۋاپ بەردى سوتتالۋشى.
"ءسىزدىڭ ازاپتاۋ بويىنشا ۇستانىمىڭىز سول كۇيىندە قالدى. تولىق مويىندامايسىز با؟" - دەدى ايجان قۇلبايەۆا.
"ءيا، مويىندامايمىن"، - دەدى بيشىمبايەۆ.
سۋديا بيشىمبايەۆتان ەكىنشى ەپيزود – ەرەكشە قاتىگەزدىكپەن ءولتىرۋ بويىنشا دا ۇستانىمىن سۇرادى.
"ەكىنشى ەپيزودتىڭ ماعان ەرەكشە قاتىگەزدىكپەن قاساقانا كىسى ءولتىردى دەگەن ايىپ تاعىلعان بولىگىندە مەن نۇكەنوۆانىڭ ولىمىنە اكەپ سوقتىرعان سوققىلاردى جاساعانىمدى مويىندايمىن، ءبىراق ونى قاساقانا جاساعانىمدى مويىندامايمىن"، - دەپ جاۋاپ بەردى بيشىمبايەۆ.
ەكىنشى سوتتالۋشى باقىتجان بايجانوۆ تا ءوز ۇستانىمىن ايتتى. ول كىناسىن مويىنداعان جوق.
"مەنىكى جاسىرىپ قالۋ بويىنشا، ءبىراق مەن ەشتەڭەنى جاسىرعان جوقپىن. مەنىڭ ونداي نيەتىم بولعان جوق. بيشىمبايەۆ ماعان جازدى، مەن ورىندادىم. مەن وندا نە بولعانىن بىلگەن جوقپىن جانە جازبانى كورمەدىم. جاسىرىپ قالۋ بويىنشا مويىندامايمىن. حابارلاماۋ بويىنشا - مەن بىلە سالىسىمەن، بىردەن حابارلادىم، جەدەل جاردەمگە قوڭىراۋ شالدىم. تاعىلعان ايىپتار بويىنشا مويىندامايمىن. ءبىراق مەنىڭ كىنام بار. جەدەل جاردەمدى ەرتەرەك شاقىرۋىما بولار ەدى. بۇل ءۇشىن كىنالىمىن"، - دەدى بايجانوۆ.
تاراپتاردىڭ جارىسسوزدەرى 29 ساۋىردە باستالىپ، 30 ساۋىردە، سونداي-اق، 2، 3 جانە 4 مامىردا جالعاسادى.
ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا بىرنەشە سوت وتىرىسى ءوتتى. ونى ءدۇيىم جۇرت جوعارعى سوتتىڭ YouTube كانالىنان ونلاين تاماشالادى.
ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتالىپ جاتقان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعاپ جاتىر.
ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى – جاننا ورازباحوۆا مەن ءاليا وماروۆا.
27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
بيشىمبايەۆقا ەكى باپ بويىنشا ايىپ تاعىلدى:
- اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛
- قيناۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
سونداي-اق، ونىڭ تۋىسى باقىتجان بايجانوۆ تا كۇدىكتى رەتىندە قاماۋعا الىندى. وعان قىلمىستىق كودەكستىڭ ەكى بابى بويىنشا ايىپ تاعىلعان. ناقتىراق ايتساق، 432-بابى (اسا اۋىر قىلمىستى جاسىرىپ قالۋ)؛ 434-بابى (اسا اۋىر قىلمىستى حابارلاماۋ).
