Aqtóbede qyzǵaldaqpen sýretke túskeni úshin synǵa ushyraǵan aýyl ákimine qatysty is boiynsha sot sheshimi jariialandy. Áleýmettik jelide daý týdyrǵan sýret WhatsApp-taǵy statýsqa qoiylǵan. Aita keteiik, buǵan deiin Shymkent turǵyny «Qyzyl kitapqa» engen gúlderdi julǵany úshin milliondaǵan teńge aiyppulmen qorqytylǵan bolatyn, dep habarlaidy Dalanews.kz.
Muǵaljar aýdany Qudaibergen Jubanov atyndaǵy okrýgtiń ákimi Liazzat Berdibaevaǵa QR Ákimshilik quqyqbuzýshylyq týraly kodeksiniń 127-baby 1-bóligi – «Ata-analardyń nemese ózge de zańdy ókilderdiń kámeletke tolmaǵan balany tárbieleý jónindegi mindetterdi oryndamaýy» baby boiynsha hattama toltyrylyp, is sotqa berilgen. Sebebi ákim bul gúlderdi ózi emes, balalary julǵanyn, al ózi tek olarmen birge sýretke túskenin aitqan. Osyǵan bailanysty, ákimniń qyzǵaldaqtyń «Qyzyl kitapqa» engenin túsindirmegeni úshin jaýapkershilikke tartý qarastyrylǵan.
Alaida sot barysynda qyzǵaldaqtarǵa saraptama jasalmaǵany jáne olardyń sirek kezdesetin, joiylyp bara jatqan ósimdikter qataryna jatatyny ǵylymi túrde dáleldenbegeni anyqtaldy. Sot bul boiynsha botanikalyq saraptama taǵaiyndady. QR Botanika jáne fitointrodýktsiia institýty Berdibaevanyń balalary julyp alǵan gúlderdiń sirek ári joiylyp bara jatqan ósimdikter qataryna jatpaitynyn habarlady. Istiń mán-jaiyn tolyq anyqtaý úshin kelesi sot otyrysy oqiǵa ornynda – Qandyaǵash baǵytyndaǵy tas jol mańyndaǵy dalada ótkiziledi dep sheshildi. Ákimniń aitýynsha, otbasy 19 sáýirde osy jerde demalyp júrgen kezde sýretke túsken.
Uzaq talqylaýdan keiin 12 maýsym kúni sot ákim Liazzat Berdibaevaǵa qatysty ákimshilik isti toqtatty. Sebebi onyń áreketinen quqyqbuzýshylyq quramy anyqtalmaǵan. Sýdia Aipatsha Mýsina politsiia qyzmetkeri hattama toltyrǵanymen, quqyqbuzýshylyqtyń naqty orny anyqtalmaǵanyn jáne is materialdarynda zań buzylǵanyn dáleldeitin naqty aiǵaqtar joq ekenin aitty. Sottyń bastamasymen botanikalyq saraptama júrgizilip, oqiǵa ornyna shyǵý arqyly tekserý júrgizilgen. Hattamada Qandyaǵash – Juryn tas jolynyń mańy kórsetilgenimen, quqyq qorǵaý organdary bul jerge barmaǵan. Is materialynda jalǵyz ǵana foto bar, al mamandar sol sýret arqyly qyzǵaldaq túrin anyqtai almaǵan.
Sot Aqtóbe oblystyq politsiia departamentine jeke qaýly shyǵardy.
