اقتوبەدە قىزعالداقپەن سۋرەتكە تۇسكەنى ءۇشىن سىنعا ۇشىراعان اۋىل اكىمىنە قاتىستى ءىس بويىنشا سوت شەشىمى جاريالاندى. الەۋمەتتىك جەلىدە داۋ تۋدىرعان سۋرەت WhatsApp-تاعى ستاتۋسقا قويىلعان. ايتا كەتەيىك، بۇعان دەيىن شىمكەنت تۇرعىنى «قىزىل كىتاپقا» ەنگەن گۇلدەردى جۇلعانى ءۇشىن ميلليونداعان تەڭگە ايىپپۇلمەن قورقىتىلعان بولاتىن، دەپ حابارلايدى Dalanews.kz.
مۇعالجار اۋدانى قۇدايبەرگەن جۇبانوۆ اتىنداعى وكرۋگتىڭ اكىمى لياززات بەردىبايەۆاعا ق ر اكىمشىلىك قۇقىقبۇزۋشىلىق تۋرالى كودەكسىنىڭ 127-بابى 1-بولىگى – «اتا-انالاردىڭ نەمەسە وزگە دە زاڭدى وكىلدەردىڭ كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋى» بابى بويىنشا حاتتاما تولتىرىلىپ، ءىس سوتقا بەرىلگەن. سەبەبى اكىم بۇل گۇلدەردى ءوزى ەمەس، بالالارى جۇلعانىن، ال ءوزى تەك ولارمەن بىرگە سۋرەتكە تۇسكەنىن ايتقان. وسىعان بايلانىستى، اكىمنىڭ قىزعالداقتىڭ «قىزىل كىتاپقا» ەنگەنىن تۇسىندىرمەگەنى ءۇشىن جاۋاپكەرشىلىككە تارتۋ قاراستىرىلعان.
الايدا سوت بارىسىندا قىزعالداقتارعا ساراپتاما جاسالماعانى جانە ولاردىڭ سيرەك كەزدەسەتىن، جويىلىپ بارا جاتقان وسىمدىكتەر قاتارىنا جاتاتىنى عىلىمي تۇردە دالەلدەنبەگەنى انىقتالدى. سوت بۇل بويىنشا بوتانيكالىق ساراپتاما تاعايىندادى. ق ر بوتانيكا جانە فيتوينترودۋكسيا ينستيتۋتى بەردىبايەۆانىڭ بالالارى جۇلىپ العان گۇلدەردىڭ سيرەك ءارى جويىلىپ بارا جاتقان وسىمدىكتەر قاتارىنا جاتپايتىنىن حابارلادى. ءىستىڭ ءمان-جايىن تولىق انىقتاۋ ءۇشىن كەلەسى سوت وتىرىسى وقيعا ورنىندا – قاندىاعاش باعىتىنداعى تاس جول ماڭىنداعى دالادا وتكىزىلەدى دەپ شەشىلدى. اكىمنىڭ ايتۋىنشا، وتباسى 19 ساۋىردە وسى جەردە دەمالىپ جۇرگەن كەزدە سۋرەتكە تۇسكەن.
ۇزاق تالقىلاۋدان كەيىن 12 ماۋسىم كۇنى سوت اكىم لياززات بەردىبايەۆاعا قاتىستى اكىمشىلىك ءىستى توقتاتتى. سەبەبى ونىڭ ارەكەتىنەن قۇقىقبۇزۋشىلىق قۇرامى انىقتالماعان. سۋديا ايپاتشا مۋسينا پوليسيا قىزمەتكەرى حاتتاما تولتىرعانىمەن، قۇقىقبۇزۋشىلىقتىڭ ناقتى ورنى انىقتالماعانىن جانە ءىس ماتەريالدارىندا زاڭ بۇزىلعانىن دالەلدەيتىن ناقتى ايعاقتار جوق ەكەنىن ايتتى. سوتتىڭ باستاماسىمەن بوتانيكالىق ساراپتاما جۇرگىزىلىپ، وقيعا ورنىنا شىعۋ ارقىلى تەكسەرۋ جۇرگىزىلگەن. حاتتامادا قاندىاعاش – جۇرىن تاس جولىنىڭ ماڭى كورسەتىلگەنىمەن، قۇقىق قورعاۋ ورگاندارى بۇل جەرگە بارماعان. ءىس ماتەريالىندا جالعىز عانا فوتو بار، ال ماماندار سول سۋرەت ارقىلى قىزعالداق ءتۇرىن انىقتاي الماعان.
سوت اقتوبە وبلىستىق پوليسيا دەپارتامەنتىنە جەكە قاۋلى شىعاردى.
