Májilis depýtaty Baqytjan Bazarbek palatanyń jalpy otyrysynda sot júiesindegi birqatar ózekti máselelerdi kóterdi, dep habarlaidy Dalanews.kz.
Onyń aitýynsha, zańdy kúshine engen sot sheshimderi tiisti deńgeide oryndalmai keledi. Bul máseleni túbegeili sheshý úshin zańnamany jetildirip, qoǵamnyń qazirgi qajettilikterine sai ózgerister engizý qajet.
"Men Májilistiń qabyldaý bólmesinde bir kúnde 160-tan astam azamatty qabyldadym. Bul – halyqtyń Parlamentke senim bildiretinin kórsetedi. Biraq jergilikti deńgeide sheshilýi tiis máselelerdiń ortalyqqa deiin jetýi – jergilikti bilik organdarynyń jumysynda olqylyqtar baryn ańǵartady", – dedi depýtat.
Onyń pikirinshe, mundai jaǵdailardy boldyrmaý úshin jergilikti atqarýshy organdardyń jaýapkershiligin kúsheitý qajet. Sonymen qatar, sot júiesi ádildik pen aqiqattyń, eń bastysy, azamattardyń quqyqtaryn jan-jaqty qorǵaityn institýtqa ainalýy tiis.
"Ázirge bul maqsat tolyq oryndalmai otyr. Taǵy bir túitkil – qoǵamda máselelerdi «sheship berýge" mamandanǵan deldaldardyń, iaǵni "pomogaikalardyń" kóbeiýi. Mundai áreketterge zań aiasynda qatań tosqaýyl qoiý kerek», – dedi Baqytjan Bazarbek.
Aita keteiik, Májilistiń búgingi otyrysynda Prezident Qasym-Jomart Toqaevtyń saiasi reformalary talqylanyp jatyr. Jiynǵa depýtattarmen qatar ǵalymdar, sarapshylar jáne BAQ ókilderi de qatysýda.
