BAQ-ta "Soltústik Koreıa Reseıge kómektesý úshin 100 myńǵa deıin sarbaz jiberýi múmkin" degen aqparat tarady. Bul týraly Bloomberg agenttigi "Úlken jıyrmalyq" (G20) elderindegi derekkózderine súıenip jazdy, - dep habarlaıdy Dalanews.kz "Azattyqqa" siltep.
Derekkózderdiń aıtýynsha, bul málimet – aldyn ala esep boıynsha jasalǵan boljam, aqparat alda rastalsa da, 100 myń sarbaz bir ýaqytta jiberilmeıdi.
"Buǵan deıin Ýkraınanyń Ońtústik Koreıadaǵy elshisi Dmıtrıı Ponomarenko "Amerıka daýysynyń" Ońtústik Koreıa qyzmetimen sóıleskende osy shamalas sarbaz sany týraly aıtqan. Elshi Reseıdiń Kýrsk oblysyndaǵy Soltústik Koreıanyń 15 myń sarbazy aı saıyn aýysyp otyrady degen", - dep jazylǵan basylym dereginde.
Jaqynda Reseı men Soltústik Koreıa eki el arasyndaǵy jan-jaqty strategıalyq seriktestik týraly kelisimdi ratıfıkasıalady. Oǵan sáıkes, taraptardyń birine qarýly shabýyl jasalǵan jaǵdaıda ekinshisi dereý áskerı jáne ózge de kómek kórsetýge mindetti.
Taraptar sondaı-aq bir-birine qarsy baǵyttaǵy úshinshi eldermen kelisim jasamaýǵa jáne óz aýmaǵyn ekinshi taraptyń egemendigin buzýǵa paıdalanýǵa jol bermeýge kelisken.
AQSH, Japonıa jáne Ońtústik Koreıa qaýipsizdik salasynda úshjaqty áriptestik jónindegi hatshylyq quratynyn málimdedi. Lımadaǵy samıtte úsh memleket basshysy Soltústik Koreıa men Reseıdiń Ýkraınadaǵy soǵysty "keńeıtý" sheshimin aıyptady.
NATO Reseı men Soltústik Koreıa arasyndaǵy áskerı áriptestik ulǵaıyp jatqanyn aıyptap, Phenánnyń sarbaz jiberýi jaǵdaıdy ýshyqtyrýy múmkin jáne bul BUU Qaýipsizdik keńesiniń qararlaryna qaıshy dedi.
