Májilis depýtaty Qazybek Isa qazaq tildi balabaqshalar máselesin kóterdi. Búgin Májiliste Áleýmettik-damý komiteti mektepke deiingi bilim berý máselelerin talqylap jatyr, dep habarlaidy dalanews.kz.
Depýtattyń sózinshe, nemerelerin elordadaǵy eki balabaqshaǵa bergen. Alaida ekeýinde de balalar oryssha sóilei bastaǵanyn baiqap, olardy basqa jerge aýystyrýǵa sheshim qabyldaǵan.
Depýtat máseleniń mán-jaiyn anyqtaý úshin balabaqshalarǵa barǵanyn, biraq qyzmetkerler arasynan ózine qazaq tilinde jaýap bergen adam tappaǵanyn jetkizdi. Keiin nemerelerin daiarlyq ortalyǵyna ornalastyryp, ol jaqqa kóńili tolǵanyn aitty.
"Eki balabaqshada da qazaq jáne orys tilinde dep jazylǵan. Biraq qarasam, nemerelerim oryssha sóilei bastady. "Nege olai?" dep bardym, ol jerde maǵan qazaqsha jaýap beretin adam tabylmady. Biraq qazaq jáne orys bólimi deidi. Kúzgi kesh boldy. Balam Abaidyń óleńin jattap bardy, odan eshkim suramapty. Ol jerde barlyǵy orys tilinde. Basqa balabaqshaǵa berdim. Onda da sondai. Sol jaǵalaýdan qazaq tildi balabaqsha tappadym", - dedi ol.
Osy jaǵdaidan keiin Qazybek Isa balabaqshalardaǵy til máselesin zerttei bastaǵanyn málimdedi. Onyń dereginshe, balabaqshalardyń shamamen 40 paiyzy qazaq tilinde, 30 paiyzy orys tilinde, taǵy 30 paiyzy aralas formatta jumys isteidi.
Depýtattyń pikirinshe, aralas balabaqshalarda oqý-tárbie úderisi kóbine orys tilinde júrgiziledi. Sondyqtan mektepke deiingi mekemelerde tárbieni memlekettik tilde júrgizý talabyn kúsheitý qajet. Ol qazaq tilin meńgerý balabaqshadan bastalatynyn aitty.
