Biz Birgemiz qorynyń quryltaishysy Perizat Qairatqa qatysty taǵy bir derektiń sheti shyqty. Eki jyl buryn atalmysh qor astanalyq turǵyn Ásel Omarovaǵa páter tabystalatynyn resmi túrde málimdegen eken. Alaida berilgen ýáde áli kúnge deiin oryndalmaǵan, dep habarlaidy Dalanews.kz.
Bul jaǵdaidy Ásel Omarova Stan.kz agenttigine baiandap berdi.
2 jyl buryn bes ailyq sábiimen kólik júrgizýshisi bolyp qyzmet atqarǵan astanalyq áiel kópshiliktiń qyzý talqysyna túsken edi. Al qazaqstandyqtar ony qoldaý maqsatynda biraýyzdan 1,7 million teńge jinap beredi.
Osy jaǵdaidan soń áielmen Perizat Qairat bailanysqa shyǵyp, úiine barǵan. Sol kezde onyń otbasyna páter syilaýǵa ýáde etken, tipti kóptiń aldynda sertifikatty resmi túrde tabystaǵan. Biraq sol kúii úi berilmegen.
“Jamandyqqa qimaimyn, degenmen “bardy bar, joqty joq” dep aitar sát kelgendei. 2022 jyly qarashada Perizat úiime kelip, “úi tabystaimyz” dep aityp ketken edi. Keiin Jańa jyldyq merekege orai úlken galakontsert bolyp, sol jerde sertifikat ustatqan. Biraq úi berilmedi”, – dedi astanalyq Ásel Omarova Stan.kz agenttigine.
Ásel Omarovaǵa belgili bir turǵyn úi kompleksinen úi beriledi dep aitylǵan. Biraq keiin habarsyz ketti deidi. Aitýynsha, ózi habarlasqan kezde “kúnde erteń” dep túrli syltaýmen Áseldi uzaq kúttirip qoiǵan.
“Úmit degen qiyn eken, “áne, mine berip qalar” dep kútip júr edim. Sońǵy ret 4-5 ai buryn habarlastyq, sol kezde “1-2 aidan soń beriledi” dedi. Biraq qaitadan únsiz qaldy”, – dedi ol.
Ásel balalarymen áli de páter jaldap turady.
Aita keteiik, QMA eriktiler qozǵalysynyń belsendisi jáne BizBirgemizQazaqstan qoǵamdyq qaiyrymdylyq qorynyń quryltaishysy Perizat Qairatqa qatysty tergeý júrgizilip jatyr.
Ol kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden astam qarajatty jymqyrdy dep kúdikke ilindi.
Qaiyrymdylyqtyń negizgi bóligi qymbat sán buiymdary men jyljymaityn múlikti satyp alý maqsatyna paidalanyldy.
Biyl kóktemde ol elordadaǵy avtosalondarda 88 mln teńgege "Mercedes-Benz S450", 80 mln teńgege "Lexus LX-600" jáne 39 mln teńgege "Haval" avtokólikterin satyp aldy.
Osy kezeńde ol jalpy somasy 600 mln teńgeni quraityn elordanyń premiým sanattaǵy "Akbulak Riviera", "Highvill Ishim Gold", "Kók Jailaý" TK (turaq oryndaryn qosa alǵanda), sondai-aq "Vela Village" kottedj qalashyǵynda jyljymaityn múlik nysandaryn satyp aldy.
Sonymen qatar, qazaqstandyqtardyń qaiyrymdylyqqa jibergen qarajat esebinen Perizat Q. Dýbai, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» siiaqty bes juldyzdy qonaq úilerde demalǵan.
Bul elderde ol "Cartier" jáne "Louis Vuitton" siiaqty brendterdiń qymbat aksessýarlary men zergerlik buiymdardy satyp alyp, feshenebeldi meiramhanalarǵa baryp, iahtalardy jaldaǵan.
Qylmystyq shemany júzege asyrý úshin dostary men týystaryna 8% syiaqy berip, qordyń aqshasy qolma-qol aqshaǵa ainaldyryp otyrǵan.
Osylaisha, Perizat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq printsipterine kúmán keltirdi jáne halyqtyń senip tapsyrǵan qarajatyn talan-tarajǵa salǵan.
16 qarasha kúni Qarjy monitoringi agenttigi Eriktiler qozǵalysynyń belsendisi Perizat Qairatqa qatysty tergeý faktisi boiynsha qosymsha aqparatty jariialady. Agenttik Perizat Qairattyń Palestinaǵa dep aqsha jinap, 200 mln teńgeden asa qarajatty jymqyrǵanyn rastady.
