Biz Birgemiz قورىنىڭ قۇرىلتايشىسى پەريزات قايراتقا قاتىستى تاعى ءبىر دەرەكتىڭ شەتى شىقتى. ەكى جىل بۇرىن اتالمىش قور استانالىق تۇرعىن اسەل وماروۆاعا پاتەر تابىستالاتىنىن رەسمي تۇردە مالىمدەگەن ەكەن. الايدا بەرىلگەن ۋادە ءالى كۇنگە دەيىن ورىندالماعان، دەپ حابارلايدى Dalanews.kz.
بۇل جاعدايدى اسەل وماروۆا Stan.kz اگەنتتىگىنە بايانداپ بەردى.
2 جىل بۇرىن بەس ايلىق سابيىمەن كولىك جۇرگىزۋشىسى بولىپ قىزمەت اتقارعان استانالىق ايەل كوپشىلىكتىڭ قىزۋ تالقىسىنا تۇسكەن ەدى. ال قازاقستاندىقتار ونى قولداۋ ماقساتىندا ءبىراۋىزدان 1،7 ميلليون تەڭگە جيناپ بەرەدى.
وسى جاعدايدان سوڭ ايەلمەن پەريزات قايرات بايلانىسقا شىعىپ، ۇيىنە بارعان. سول كەزدە ونىڭ وتباسىنا پاتەر سىيلاۋعا ۋادە ەتكەن، ءتىپتى كوپتىڭ الدىندا سەرتيفيكاتتى رەسمي تۇردە تابىستاعان. ءبىراق سول كۇيى ءۇي بەرىلمەگەن.
“جاماندىققا قيمايمىن، دەگەنمەن “باردى بار، جوقتى جوق” دەپ ايتار ءسات كەلگەندەي. 2022 جىلى قاراشادا پەريزات ۇيىمە كەلىپ، “ءۇي تابىستايمىز” دەپ ايتىپ كەتكەن ەدى. كەيىن جاڭا جىلدىق مەرەكەگە وراي ۇلكەن گالاكونسەرت بولىپ، سول جەردە سەرتيفيكات ۇستاتقان. ءبىراق ءۇي بەرىلمەدى”، – دەدى استانالىق اسەل وماروۆا Stan.kz اگەنتتىگىنە.
اسەل وماروۆاعا بەلگىلى ءبىر تۇرعىن ءۇي كومپلەكسىنەن ءۇي بەرىلەدى دەپ ايتىلعان. ءبىراق كەيىن حابارسىز كەتتى دەيدى. ايتۋىنشا، ءوزى حابارلاسقان كەزدە “كۇندە ەرتەڭ” دەپ ءتۇرلى سىلتاۋمەن اسەلدى ۇزاق كۇتتىرىپ قويعان.
“ءۇمىت دەگەن قيىن ەكەن، “انە، مىنە بەرىپ قالار” دەپ كۇتىپ ءجۇر ەدىم. سوڭعى رەت 4-5 اي بۇرىن حابارلاستىق، سول كەزدە “1-2 ايدان سوڭ بەرىلەدى” دەدى. ءبىراق قايتادان ءۇنسىز قالدى”، – دەدى ول.
اسەل بالالارىمەن ءالى دە پاتەر جالداپ تۇرادى.
ايتا كەتەيىك، قما ەرىكتىلەر قوزعالىسىنىڭ بەلسەندىسى جانە BizBirgemizQazaqstan قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىلىپ جاتىر.
ول كوكتەمگى سۋ تاسقىنىنان زارداپ شەككەن ازاماتتارعا كومەكتەسۋ ءۇشىن جينالعان 1،5 ملرد تەڭگەدەن استام قاراجاتتى جىمقىردى دەپ كۇدىككە ءىلىندى.
قايىرىمدىلىقتىڭ نەگىزگى بولىگى قىمبات ءسان بۇيىمدارى مەن جىلجىمايتىن مۇلىكتى ساتىپ الۋ ماقساتىنا پايدالانىلدى.
بيىل كوكتەمدە ول ەلورداداعى اۆتوسالونداردا 88 ملن تەڭگەگە "Mercedes-Benz S450"، 80 ملن تەڭگەگە "Lexus LX-600" جانە 39 ملن تەڭگەگە "Haval" اۆتوكولىكتەرىن ساتىپ الدى.
وسى كەزەڭدە ول جالپى سوماسى 600 ملن تەڭگەنى قۇرايتىن ەلوردانىڭ پرەميۋم ساناتتاعى "Akbulak Riviera"، "Highvill Ishim Gold"، "كوك جايلاۋ" تك (تۇراق ورىندارىن قوسا العاندا)، سونداي-اق "Vela Village" كوتتەدج قالاشىعىندا جىلجىمايتىن مۇلىك نىساندارىن ساتىپ الدى.
سونىمەن قاتار، قازاقستاندىقتاردىڭ قايىرىمدىلىققا جىبەرگەن قاراجات ەسەبىنەن پەريزات ق. دۋباي، دوحا، لوندون جانە ستامبۋلداعى «St. Regis»، «Shangri-La»، «Palazzo Versace» جانە «Kempinski» سياقتى بەس جۇلدىزدى قوناق ۇيلەردە دەمالعان.
بۇل ەلدەردە ول "Cartier" جانە "Louis Vuitton" سياقتى برەندتەردىڭ قىمبات اكسەسسۋارلارى مەن زەرگەرلىك بۇيىمداردى ساتىپ الىپ، فەشەنەبەلدى مەيرامحانالارعا بارىپ، ياحتالاردى جالداعان.
قىلمىستىق سحەمانى جۇزەگە اسىرۋ ءۇشىن دوستارى مەن تۋىستارىنا 8% سىياقى بەرىپ، قوردىڭ اقشاسى قولما-قول اقشاعا اينالدىرىپ وتىرعان.
وسىلايشا، پەريزات ق. ءوزىنىڭ زاڭسىز ارەكەتتەرىمەن ەرىكتىلەر قوزعالىسىنىڭ بەدەلىنە نۇقسان كەلتىرىپ، ونىڭ اشىقتىق پەن ادالدىق پرينسيپتەرىنە كۇمان كەلتىردى جانە حالىقتىڭ سەنىپ تاپسىرعان قاراجاتىن تالان-تاراجعا سالعان.
16 قاراشا كۇنى قارجى مونيتورينگى اگەنتتىگى ەرىكتىلەر قوزعالىسىنىڭ بەلسەندىسى پەريزات قايراتقا قاتىستى تەرگەۋ فاكتىسى بويىنشا قوسىمشا اقپاراتتى جاريالادى. اگەنتتىك پەريزات قايراتتىڭ پالەستيناعا دەپ اقشا جيناپ، 200 ملن تەڭگەدەن اسا قاراجاتتى جىمقىرعانىن راستادى.
