Májilis depýtaty Ermurat Bápi otstavkaǵa ketken Smaiylov Úkimeti kedeishilikke qarsy kúreste ekonomikalyq mindetterdi júieli atqara almaǵanyn aitty, dep habarlaidy Dalanews.kz.
“Ótken jyly men Álihan Smaiylovtyń Úkimet basshysy bolýyna qarsy daýys bergem. Smaiylov jaqsy jigit bolǵanymen, onyń premerlik fýnktsiiany atqarýǵa shamasy jetpedi. Otstavkaǵa ketken Úkimet qymbatshylyqty aýyzdaqtai almady ári kedeishilikke qarsy úkimettik baǵdarlama jasai almady. Iaǵni, Úkimet ózine júktelgen mindetterdi atqarýǵa qaýqary jetpedi”, - dedi Ermurat Bápi.
Depýtat jańa Úkimet basshysy retinde “Amanat" partiiasy usynǵan Oljas Bektenovtiń kandidatýrasyn qoldaitynyn aitty. Onyń oiynsha, Bektenov zańsyz ketken aktivterdi elge qaitara alady.
“Qazir eldiń biýdjeti defitsit jaǵdaida, onyń ústine qazynany investitsiia quiýmen toltyrý bolmaityn nárse. Óitkeni ol ústeme paiyzben qaitarylatyn dúnie. Meniń oiymsha, biýdjetti toltyrýdyń ádisiniń biri el ishinde jáne shetel asqan aktivterdi qaitarý. Meniń oiymsha, Oljas Bektenov Úkimet basyna kelse, Prezident aldymen zańsyz ketken aktivterdi qaitarýdy mindetteidi. Árine, Bektenov buǵan deiin ákim ne ministr bolmady. Biraq ol Prezident ákimshiligin basqaryp, tájiribe jinady. Odan bólek, sybailas jemqorlyqpen kúres agenttiginiń tóraǵasy boldy”, - deidi depýtat.
Osy tusta Bápi Bektenovke zańsyz shetel asqan qarajat, sybailas jemqorlyqpen kúres taqyryby tańsyq bolmaitynyn alǵa tartty.
