Májilis depýtaty, Ulttyq quryltai jáne Parlamenttegi «AMANAT» partiiasy fraktsiiasynyń múshesi Edil Jańbyrshin Mańǵystaýǵa barǵan saparynyń qorytyndysy týraly jelide jazdy.
«Eldiń kóńili referendýmǵa deiingidei emes. Jabyrqaý... Kútken jańalyqtyń kóńilden shyqpaǵany kórinip tur. Sharyqtap ketken baǵa, tityqtatqan jumyssyzdyq, teńizdiń qasynda otyryp, aýyzsýǵa jarymaý, aita berseń problema shash etekten.
Qurylys jumystaryna qarjy jetispeidi, jobalyq-smetalyq qujattar túgelge jýyq korrektirovkadan ótýi kerek. Oǵan da qarjy jetispei jatyrǵanyn aitady qurylysshylar. Arty ne bolmaq?
Mekteptegi saǵat qysqartýdan bosaǵan muǵalimder máselesi taǵy bar.
Janar-jaǵarmai defitsiti. Biz munai men gazdyń ústinde otyrǵan elmiz, úsh munai óńdeý zaýytymyz bar. Bul qalai sonda?!
Qant tapshylyǵy neshe ai boldy, áli rettelgen joq, retteletin túri de kórinbeidi.
Osylardy júieli sheshýge baǵyttalǵan jobalar da kórinbeidi. Bul bireýdi kinálaý emes, halyqtyń aityp otyrǵan –nazy men syny. El qatty qinalyp otyr. Jaǵdai «eski Qazaqstannan da» jaman bolyp ketti dep aityp otyrǵandar bar.
Meniń oiym aitady:
1. Eski júiede jumys istep qalǵan sheneýnikter, jańa jaǵdaiǵa beiimdele almai, jańasha jumys istei almai otyr. Eski «Jigýli» qansha ádemileseń de «Toiota» bola almaidy. Qansha ret aittyq, jańa kadrlar kerek dep. Bárin jasaityn adam, 8 aida eshteńe jasai almaǵan Úkimet, endi birdeńe qatyra qoiady degenge óz basym senbeimin. Renjimesin jigitter.
2. Áli kúnge deiin ekonomikany «jaýlap» alǵan oligarhtar ketpegen. Sol baiaǵy «órkesh maidy» sorý júrip jatyr. Bir shemadan, ekinshi shemaǵa aýysyp. Áitpese kúni keshe tym jaqsy satylyp turǵan dizel otyny men benzin nege joq? Sol baiaǵy tarifter, sol baiaǵy «otkattar», sol baiaǵy jemqorlyq, sol baiaǵy áýe biletteriniń qymbatshylyǵy jáne t.s.s.
3. Sabotaj.
Eski kadrlar men ekonomikaǵa kirip alǵan «parazitter» Memleket basshysynyń halyq aldynda bedelin túsirip, taqtan taidyrý.
Aldaǵy ýaqytta olar ózderiniń qýattary men resýrstary kúirep, halyqtyń ál-aýqaty artatynyn biledi. Shamalary kelgenshe qarsylasýda. Qarsylyq barlyq salada jáne deńgeide júrip jatyr.
Ne isteý kerek?
Biliktiń barlyq tarmaǵyna jańa, taza adamdardy ákelý qajet. Tek memleket múddesin oilaityn. Ondai azamattar 19 million halyq ishinen tabylady.
Ekinshi. «Parazitterdi» qurtý kerek, áitpese qoǵamda úlken «epidemiia» bolady.
Úshinshi. Muny tez jasaý kerek. Jańa jylǵa deiin. Shydamnyń da shegi bar ekenin umytpaǵan jón!», – deidi depýtat
