Aibek Smadiiarov shetel azamattary asyrap alǵan bala 18 jasqa deiin Qazaqstan Respýblikasynyń azamaty bolyp qalatynyn málimdedi. Muny sheteldegi konsýldar arnaiy baǵdarlama boiynsha baqylap, kómektesedi eken. Al 18 jasqa tolǵannan keiin bala qai eldiń azamattyǵyn alatynyn ózi sheshedi.
"18 jasqa tolǵanǵa deiin sol eldiń azamattyǵyn alsa, biz óz sheshimi bolǵannan keiin esh áreket jasai almaimyz. Biraq ol jasqa deiin asyrap alǵan ata-analar konsýlǵa esep berip turýy kerek.
Al "balalar týraly aqparat joq" degen shyndyqqa sáikes kelmeidi. Óitkeni barlyq bala boiynsha aqparattardy jinap otyramyz. Árine, keibir kezde bir mekenjaidan basqa mekenjaiǵa kóship ketip, aqparat bolmai qalýy múmkin", - deidi SIM ókili.
Sonymen qatar, vedomstvo ókili toqsanynshy jyldary qazaq balalary tek Batys elderine berilgenin málimdedi.
"Qazaq balalaryn biraz ekzotikalyq elderge alyp ketti" degen de aqparatty oqydym. Ol ras emes. Óitkeni bizde kezinde toqsanynshy jyldary "balalardy tek Batys elderiniń ókilderine beretin" talap bolǵan. Batys elderiniń azamattary sol elderde diplomat bolyp jumys isteýi múmkin. Solar asyrap alǵan. Ondai elderge (Afrika elderine - esk.) biz balalardy bermeimiz", - deidi ol.
Qazirgi tańda 18 jasqa deiingi 1993 bala konsýldyq esepte tur eken.
Aibek Smadiiarov "júzden asa bala Afrika elderine ketti" degen aqparatqa da jaýap berdi.
"Ol aqparatty qaidan alǵanyn bilmeimin. Bizdegi aqparatqa sáikes, biz Afrika elderine balalardy bergen joqpyz", - dedi.
Sondai-aq, ol balalarmen bailanys úzildi degen aqparat ta shyndyqqa janaspaitynyn jetkizdi.
Sýret: kp.kz
