ايبەك سمادياروۆ شەتەل ازاماتتارى اسىراپ العان بالا 18 جاسقا دەيىن قازاقستان رەسپۋبليكاسىنىڭ ازاماتى بولىپ قالاتىنىن مالىمدەدى. مۇنى شەتەلدەگى كونسۋلدار ارنايى باعدارلاما بويىنشا باقىلاپ، كومەكتەسەدى ەكەن. ال 18 جاسقا تولعاننان كەيىن بالا قاي ەلدىڭ ازاماتتىعىن الاتىنىن ءوزى شەشەدى.
"18 جاسقا تولعانعا دەيىن سول ەلدىڭ ازاماتتىعىن السا، ءبىز ءوز شەشىمى بولعاننان كەيىن ەش ارەكەت جاساي المايمىز. ءبىراق ول جاسقا دەيىن اسىراپ العان اتا-انالار كونسۋلعا ەسەپ بەرىپ تۇرۋى كەرەك.
ال "بالالار تۋرالى اقپارات جوق" دەگەن شىندىققا سايكەس كەلمەيدى. ويتكەنى بارلىق بالا بويىنشا اقپاراتتاردى جيناپ وتىرامىز. ارينە، كەيبىر كەزدە ءبىر مەكەنجايدان باسقا مەكەنجايعا كوشىپ كەتىپ، اقپارات بولماي قالۋى مۇمكىن"، - دەيدى ءسىم وكىلى.
سونىمەن قاتار، ۆەدومستۆو وكىلى توقسانىنشى جىلدارى قازاق بالالارى تەك باتىس ەلدەرىنە بەرىلگەنىن مالىمدەدى.
"قازاق بالالارىن ءبىراز ەكزوتيكالىق ەلدەرگە الىپ كەتتى" دەگەن دە اقپاراتتى وقىدىم. ول راس ەمەس. ويتكەنى بىزدە كەزىندە توقسانىنشى جىلدارى "بالالاردى تەك باتىس ەلدەرىنىڭ وكىلدەرىنە بەرەتىن" تالاپ بولعان. باتىس ەلدەرىنىڭ ازاماتتارى سول ەلدەردە ديپلومات بولىپ جۇمىس ىستەۋى مۇمكىن. سولار اسىراپ العان. ونداي ەلدەرگە (افريكا ەلدەرىنە - ەسك.) ءبىز بالالاردى بەرمەيمىز"، - دەيدى ول.
قازىرگى تاڭدا 18 جاسقا دەيىنگى 1993 بالا كونسۋلدىق ەسەپتە تۇر ەكەن.
ايبەك سمادياروۆ "جۇزدەن اسا بالا افريكا ەلدەرىنە كەتتى" دەگەن اقپاراتقا دا جاۋاپ بەردى.
"ول اقپاراتتى قايدان العانىن بىلمەيمىن. بىزدەگى اقپاراتقا سايكەس، ءبىز افريكا ەلدەرىنە بالالاردى بەرگەن جوقپىز"، - دەدى.
سونداي-اق، ول بالالارمەن بايلانىس ءۇزىلدى دەگەن اقپارات تا شىندىققا جاناسپايتىنىن جەتكىزدى.
سۋرەت: kp.kz
