Qyzylorda oblysynyń ákimi Nurlybek Nálibaevtyń qatysýymen Syrdariia aýdanynyń Besaryq aýylynda sport kesheni ashyldy,- dep habarlaidy Dalanews.kz Qyzylorda oblysy ákiminiń baspasóz qyzmetine silteme jasap.
Saltanatty sharaǵa jaýapty sala basshylary, eńbek ardagerleri, ziialy qaýym ókilderi men aýyl turǵyndary qatysty.
Oblys ákimi aýyldaǵy jańa ári sáýletti ǵimarattar qatary taǵy bir mańyzdy nysanmen tolyqqanyn atap, jergilikti turǵyndardy quttyqtady.
«Búgin berekesi men birligi jarasqan Syrdariia aýdanynyń Besaryq aýylynda ózderińizben júzdeskenimizge qýanyshtymyz. Prezidentimiz Qasym-Jomart Kemeluly HHHIII jazǵy Olimpiada oiyndarynyń júldegerlerimen kezdesýde: «Buqaralyq sportty damytý arqyly biz kásibi sportqa jol ashamyz jáne eń bastysy, ult saýlyǵyn jaqsartamyz. Memleket sport infraqurylymyn damytý úshin tiisti qarajat bólýde, iaǵni balalardyń jastaiynan alańsyz sportpen shuǵyldanýyna qajetti jaǵdaidy jasap jatyr. Elimizdiń aimaqtarynda 20 myńnan astam sport alańy jumys istep tur, 16 myńnan asa arnaiy keshen men zal bar. Osy nysandardyń barlyǵy tolyqqandy qyzmet etýge tiis jáne sportpen ainalysamyn degen árbir adamǵa qoljetimdi bolýy kerek», – degen bolatyn. Sport – elimizdi halyqaralyq deńgeide tanytyp, Kók Týymyzdy jelbiretetin, Ánuranymyzdy asqaqtatatyn airyqsha mańyzdy sala. Ótken jyly qazan aiynda Qyzylorda qalasynda «Ústel tennisi» ortalyǵy paidalanýǵa berildi. Halyqaralyq standarttarǵa sáikes keletin «Ortalyq stadiondy» aldaǵy mamyr aiynda el igiligine tabystaimyz. Jaqyn kúnderi kópbeiindi «Qyzylorda Arena», deneshynyqtyrý-saýyqtyrý keshenderiniń qurylysy bastalady.
Syrdariia aýdanynyń sport salasynda júieli jumystar júrgizilýde. Ótken jyly sportshylar respýblika chempionattarynan 29 altyn, 20 kúmis, 47 qola, Aziia chempionatynan 4 altyn, 1 kúmis, 2 qola, Álem chempionatynan 1 altyn medal ielendi.Búgin ashylǵan jańa sport kesheninde aýyl turǵyndarynyń, jetkinshekterdiń dene shynyqtyrýyna, sportpen ainalysýyna jetkilikti múmkindik bar. Osy jerde jattyqqan balalarymyz densaýlyǵy men rýhy myqty, jigerli, qairatty, bolashaqta eldiń dańqyn asqaqtatatyn azamattar bolsyn deimiz. Jańa nysan salaýattylyq saltyn ustanýǵa shaqyratyn qutty orynǵa ainalsyn!» – dedi N.Nálibaev.
Saltanatty sharada sport salasynyń qyzmetkerleri men ardagerlerine oblys ákiminiń Alǵys haty tabystaldy.
Qoǵam qairatkeri, Qyzylorda oblysynyń qurmetti azamaty Aitbai Kósherbaev quttyqtaý lebizin jetkizip, Besaryq aýyldyq qoǵamdyq keńestiń tóraǵasy Ákbar Aqjigitov batasyn berdi.
Jańadan ashylǵan keshen bir mezette 100-ge jýyq balany qabyldaidy. Bul jerge kelýshiler qazaq kúresi, dziýdo, boks, grek-rim, erkin kúres, taekvondo, voleibol, fýtbolmen ainalysa alady.
