Qyzylordada qalanyń Qazaq avtonomiialy keńestik sotsialistik respýblikasynyń astanasy bolǵanyna 100 jyl tolýyna orai «Úsh dáýirdiń astanasy – Qyzylorda» atty respýblikalyq aqyndar aitysy ótti, – dep habarlaidy Dalanews.kz
1000 oryndyq "Óner ortalyǵy" sóz dodasyn qyzyqtaǵan kórermenge toldy. Aityskerler qazaqtyń bas aqyny Abai Qunanbaiulynyń týǵanyna 180 jyl, Qyzylorda qalasynyń Qazaq eliniń astanasy bolǵanyna 100 jyl tolýy, Uly Jeńistiń 80 jyldyǵy, Baiqońyr ǵarysh ailaǵynyń 70 jyldyǵy jáne Qazaqstan halqy Assambleiasynyń 30 jyldyǵyn jyrǵa qosty.
Qazylar alqasyna memleket jáne qoǵam qairatkeri Saýytbek Abrahmanov tóraǵalyq etti. Quramynda Qazaqstannyń eńbek sińirgen qairatkeri Júrsin Erman, halyqaralyq «Alash» ádebi syilyǵynyń laýreaty Ǵalym Jailybai, Mádeniet salasynyń úzdigi, Aqmola oblystyq tarihi-ólketaný mýzeiiniń direktory Qudaiberli Myrzabek, Qazaqstannyń eńbek sińirgen qairatkeri, Qazaq ulttyq óner ýniversitetiniń professory, jyraý Almas Almatov, sondai-aq aitysker aqyn, filologiia ǵylymdarynyń kandidaty, Qazaqstannyń eńbek sińirgen qairatkeri Mels Qosymbaev boldy.
Aitysty Qazaqstannyń eńbek sińirgen qairatkeri, filologiia ǵylymdarynyń doktory Amanjol Áltai júrgizdi.
Alaman aitystyń bas júldesi Sara Toqtamysovaǵa buiyrdy. I oryn qyzylordalyq aqyn Meiirbek Sultanhanǵa, II oryn Muhtar Niiazovqa, al III oryn Abai oblysynan kelgen Rústem Qaiyrtai men Qaraǵandy oblysynyń aqyny Maqsat Ahanovqa berildi.
Sondai-aq, Jansaia Mýsina (Batys Qazaqstan oblysy) men Bekarys Shoibekov (Túrkistan oblysy) arnaiy júldemen marapattaldy.
Sóz dodasynyń kórigin qyzdyrǵan Qaraǵandy oblysynyń aqyny Didar Qamievke, Pavlodar oblysynan kelgen Aspanbek Shuǵataiǵa, aqtóbelik Zliqa Naýryzalina men Nurbol Jaýynbaevqa, sondai-aq Túrkistan oblysynan kelgen Nurmahan Jaqypbekke 500 myń teńgeden syiaqy tabystaldy.
