قىزىلوردادا قالانىڭ قازاق اۆتونوميالى كەڭەستىك سوسياليستىك رەسپۋبليكاسىنىڭ استاناسى بولعانىنا 100 جىل تولۋىنا وراي «ءۇش ءداۋىردىڭ استاناسى – قىزىلوردا» اتتى رەسپۋبليكالىق اقىندار ايتىسى ءوتتى، – دەپ حابارلايدى Dalanews.kz
1000 ورىندىق "ونەر ورتالىعى" ءسوز دوداسىن قىزىقتاعان كورەرمەنگە تولدى. ايتىسكەرلەر قازاقتىڭ باس اقىنى اباي قۇنانباي ۇلىنىڭ تۋعانىنا 180 جىل، قىزىلوردا قالاسىنىڭ قازاق ەلىنىڭ استاناسى بولعانىنا 100 جىل تولۋى، ۇلى جەڭىستىڭ 80 جىلدىعى، بايقوڭىر عارىش ايلاعىنىڭ 70 جىلدىعى جانە قازاقستان حالقى اسسامبلەياسىنىڭ 30 جىلدىعىن جىرعا قوستى.
قازىلار القاسىنا مەملەكەت جانە قوعام قايراتكەرى ساۋىتبەك ابراحمانوۆ ءتوراعالىق ەتتى. قۇرامىندا قازاقستاننىڭ ەڭبەك سىڭىرگەن قايراتكەرى ءجۇرسىن ەرمان، حالىقارالىق «الاش» ادەبي سىيلىعىنىڭ لاۋرەاتى عالىم جايلىباي، مادەنيەت سالاسىنىڭ ۇزدىگى، اقمولا وبلىستىق تاريحي-ولكەتانۋ مۋزەيىنىڭ ديرەكتورى قۇدايبەرلى مىرزابەك، قازاقستاننىڭ ەڭبەك سىڭىرگەن قايراتكەرى، قازاق ۇلتتىق ونەر ۋنيۆەرسيتەتىنىڭ پروفەسسورى، جىراۋ الماس الماتوۆ، سونداي-اق ايتىسكەر اقىن، فيلولوگيا عىلىمدارىنىڭ كانديداتى، قازاقستاننىڭ ەڭبەك سىڭىرگەن قايراتكەرى مەلس قوسىمبايەۆ بولدى.
ايتىستى قازاقستاننىڭ ەڭبەك سىڭىرگەن قايراتكەرى، فيلولوگيا عىلىمدارىنىڭ دوكتورى امانجول ءالتاي جۇرگىزدى.
الامان ايتىستىڭ باس جۇلدەسى سارا توقتامىسوۆاعا بۇيىردى. I ورىن قىزىلوردالىق اقىن مەيىربەك سۇلتانحانعا، II ورىن مۇحتار نيازوۆقا، ال III ورىن اباي وبلىسىنان كەلگەن رۇستەم قايىرتاي مەن قاراعاندى وبلىسىنىڭ اقىنى ماقسات احانوۆقا بەرىلدى.
سونداي-اق، جانسايا مۋسينا (باتىس قازاقستان وبلىسى) مەن بەكارىس شويبەكوۆ (تۇركىستان وبلىسى) ارنايى جۇلدەمەن ماراپاتتالدى.
ءسوز دوداسىنىڭ كورىگىن قىزدىرعان قاراعاندى وبلىسىنىڭ اقىنى ديدار قامييەۆكە، پاۆلودار وبلىسىنان كەلگەن اسپانبەك شۇعاتايعا، اقتوبەلىك زليقا ناۋرىزالينا مەن نۇربول جاۋىنبايەۆقا، سونداي-اق تۇركىستان وبلىسىنان كەلگەن نۇرماحان جاقىپبەككە 500 مىڭ تەڭگەدەن سىياقى تابىستالدى.
