Qazaqstanda SIM-box arqyly azamattarǵa jappai alaiaqtyq qońyraý shalǵan transulttyq uiymdasqan qylmystyq toptyń 24 múshesi 8 jylǵa bas bostandyǵynan aiyryldy, dep habarlaidy dalanews.kz.
«Sot uiymdasqan topqa qatysýshylardyń kelisilgen túrde áreket etkenin, árqaisysyna belgili bir ról berilgenin jáne olardyń áreketterin uiymdastyrýshylar úilestirgenin anyqtady», — dep habarlady Qaraǵandy oblysynyń prokýratýrasy.
Astana qalasynyń Qylmystyq ister jónindegi aýdanaralyq soty 24 sottalýshyny kináli dep tanyp, árqaisysyna 8 jyl bas bostandyǵynan aiyrý jazasyn taǵaiyndaǵan.
Sot anyqtaǵandai, top músheleriniń basym bóligi Qazaqstanǵa Reseiden kelgen. Keibir qatysýshylar uiymdastyrýshylardyń tapsyrmasymen qajetti jabdyqtardy alý úshin Reseige barǵan.
Oryndaýshylar negizinen Telegram arqyly izdelgen. Olarǵa belgili bir qalaǵa kelip, turǵyn úi jaldaý, SIM-box qurylǵysyn alý nemese jetkizý, ony internetke qosý, qazaqstandyq operatorlardyń SIM-kartalaryn ornatý jáne jabdyqtyń úzdiksiz jumysyn qamtamasyz etý tapsyrylǵan.
Bul jumysy úshin qatysýshylarǵa táýligine 50-den 100 dollarǵa deiin syiaqy tólengen.
Is boiynsha negizgi dálelderdiń biri sottalǵandardyń telefondarynan tabylǵan Telegram hattary bolǵan. Habarlamalarda jabdyqty ornatý jáne tehnikalyq qyzmet kórsetý, SIM-kartalardy aýystyrý, tapsyrmalardy oryndaý jáne úilestirýshilerge esep berý jónindegi nusqaýlar jazylǵan.
SIM-box-qa qosylǵan telefon nómirleri arqyly azamattarǵa alaiaqtyq qońyraýlar jasalǵan. Qaskúnemder ózderin memlekettik organdardyń, bankterdiń, «Qazposhta» AQ jáne basqa uiymdardyń qyzmetkerleri retinde tanystyrǵan.
Olar azamattardan rastaý kodtaryn alyp, nesie rásimdeýge jáne aqshalai qarajat aýdarýǵa kóndirgen.
Sottalýshylar kinásin moiyndamaǵan. Alaida prokýratýra usynǵan dáleldemeler olardyń uiymdasqan qylmystyq áreketke qatystylyǵyn rastaǵan.
Úkim ázirge zańdy kúshine engen joq.
