TJM akademiiasynyń qyzmetkerleri men kýrsanttary sybailas jemqorlyq jasaǵany úshin sottaldy, dep habarlaidy Dalanews.kz.
Oblystyq kámeletke tolmaǵandardyń isteri jónindegi mamandandyrylǵan aýdanaralyq sotynyń málimetinshe, akademiianyń úsh kýrsanty (Qylmystyq Kodeksiniń 367-babynyń 1-bóligi) sabaq úlgerimi boiynsha qajet ball jinaý úshin vzvod komandiri E. Arqyly, azamattyq qorǵaý polkovnigi – oqytýshy H.-ǵa 5 000 teńgeden para bergen (QK-niń 366-baby 3-bóliginiń 4-tarmaǵy). Bul qylmysta E. deldaldyq jasaǵan (QK-niń 368-babynyń 2-bóligi).
"Sonymen qatar, E. jábirlenýshi S.-ǵa, onyń ulyn oqýǵa túsirý múmkindigine ie bolmai, 2,5 mln teńgemen máseleni sheshýdi usynyp, alaiaqtyq jasady.
Oǵan qosa, ókilettikterine ataq berý quqyǵy kirmegen Akademiia komandirleri E. jáne Sh. kórsetilgen kómek úshin dep kýrsanttardy aldap, olardan 267 000 teńge alǵan.
Osylaisha, E. jáne Sh. quqyq qorǵaý organynyń qyzmetkerleri bola tura, qyzmettik babyn paidalana otyryp, sóz bailasyp alaiaqtyq jasaǵan, E. birneshe ret jasaǵan (QK-niń 190-baby 3-bóliginiń 2,3,4-tarmaqtary)", - delingen habarlamada.
Jazany taǵaiyndaýda sot kýrsant E.-niń kámeletke tolmaǵanyn, vzvod komandirleri E. jáne Sh.-da jas balalardyń bolýyn jáne jábirlenýshi S.-ǵa keltirilgen zalaldy erikti túrde tolyq ótegenin jeńildetetin mán-jailar dep sanap, al aýyrlatatyn mán-jailar – quqyq qorǵaý organy qyzmetkerleriniń qabyldaǵan antyn buza qylmys jasaǵandaryn eskerdi.
"Sot úkimimen H.-ǵa paranyń 60 eselengen somasynda aiyppul, E.-ǵa 3 jyl 6 ai bas bostandyǵynan aiyrý, Sh.-ǵa paranyń 10 eselengen somasynda aiyppul, árqaisysyna memlekettik qyzmette qyzmet atqarý quqyǵynan jáne arnaiy ataqtarynan aiyrý taǵaiyndaldy. Kýrsanttar S., A. jáne kámeletke tolmaǵan E.-ǵa aiyppul taǵaiyndaldy.
Sonymen qatar, sot QR TJM atyna sybailas jemqorlyq quqyq buzýshylyqtardyń aldyn alý boiynsha jumystyń jetkiliksizdigine, Akademiianyń kadr qyzmeti men qaýipsizdik basqarmasynyń tiisti jumys júrgizbeýine nazar aýdara otyryp, jekeshe qaýly shyǵardy. Sot aktileri zańdy kúshine engen joq", - delingen sottyń málimetinde.
