Ońtústik Qazaqstan oblysynyń ortalyǵy Shymkent qalasynda «Shymkent Build – 2018» atty qurylys jáne interer kórmesi bastaldy. Úsh kúnge josparlanǵan sharanyń maqsaty - qurylys sektorynda ozyq tehnologiialardy jetildirip, otandyq jáne sheteldik kásiporyndardyń jetistikterin pash etý. Sondai-aq, memlekettik organdar men qarjy institýttarynyń, ǵylym men biznestiń arasynda altyn kópir ornatý bolyp tabylady.
Kórmede Qazaqstan, Ózbekstan jáne Resei elderiniń 30-ǵa jýyq kásiporynnyń qurylys, árleý materialdary men jabdyǵy, lak-syr ónimderi, qurylys tehnikasy, ǵimarattardy avtomattandyrý qurylǵylary men jylytý, sýmen qamtý jybdyqtary qoiyldy.
Kórmeni aralap tanysqan oblys ákimi Janseiit Túimebaev qatysýshylarǵa alǵysyn bildirip, sharanyń mańyzdylyǵyna toqtaldy.
Óńir basshysy jýyrda ǵana Elbasymyz bes áleýmettik bastamany naqtylap bergenin aityp, osyǵan orai aǵymdaǵy jyly Ońtústik Qazaqstan oblysynda turǵyn úi salý qarqyny kúsheie túsetindigin jetkizdi. Bul rette búgingi uiymdastyrylyp otyrǵan «Shymkent Build – 2018» kórmesi óńirdegi qurylys indýstriiasynyń damýyna mańyzdy úles qosary sózsiz. Oblys ákimi qazirgi ýaqytta aimaqtyń qurylys indýstriiasy belsendi túrde damyp keletindigin aitty.
Aita keteiik, Ońtústik Qazaqstan oblysynda aldaǵy besjyldyqta 2016-2020 jyldarǵa arnalǵan damý baǵdarlamasy aiasynda 4,8 mln sharshy metr turǵyn úi salý josparlanýda. Búgingi tańda óńirde «Nurly jer» memlekettik baǵdarlamasy boiynsha 2021 jylǵa deiin 1 mln. sharshy metr turǵyn úidi el igiligine berý úrdisi qalyptasty. Budan bólek, Shymkent qalasyn Qazaqstannyń úshinshi megapolisi retinde damytý maqsatynda «ShymkentCity» jobasy júzege asyrylýda.
«Shymkent Build – 2018» kórmesi aiasynda «Qurylys salasyna jańa tehnologiialardy engizý» taqyrybynda konferentsiia uiymdastyrylady dep kútilýde. Atalǵan shara barysynda kórme qatysýshylary qurylys sektoryndaǵy eń ózekti máselelerdi ózara talqyǵa salatyn bolady.
OQO ákiminiń baspasóz qyzmeti
