Qyzylorda oblysynyń ákimi Nurlybek Nálibaevtyń qatysýymen Shieli aýdanynyń Bestam aýylynda 150 oryndyq klýbtyń ashylý rásimi ótti. Oǵan jaýapty quqyq qorǵaý organdarynyń birinshi basshylary, ziialy qaýym ókilderi men aýyl turǵyndary qatysty, dep habarlaidy Dalanews.kz.
Aimaq basshysy óńirde iske asqan igilikterge toqtalyp, jinalǵan jurtshylyqqa quttyqtaýyn jetkizdi.
«Prezidentimizdiń Syr óńiriniń damý qarqynyna, atqarǵan jumysymyzǵa bergen oń baǵasy bárimiz úshin zor mártebe. Memleket basshysy Qasym-Jomart Kemelulynyń 2022 jyly qarasha aiynda Qazaqstan Respýblikasy Prezidenti laýazymyna kiriskennen keiingi eń alǵashqy qol qoiǵan Jarlyǵy «Aýyldyq aýmaqtardy damytýdyń 2023-2027 jyldarǵa arnalǵan tujyrymdamasy» boldy.
Aýyldardy damytý – memlekettik saiasattyń mańyzdy strategiialyq maqsattarynyń biri. Prezidentimiz Úkimet pen oblys ákimderine memleket tarapynan jasalǵan barlyq qoldaýdy tiimdi, maqsatty paidalanyp, aýyl halqynyń tabysyn arttyrý, ekonomikasyn joǵary kórsetkishterge jetkizý mindetin qoidy. Búginde oblystyń 447 myń turǵyny (halyq sany 845 myń adam), iaǵni 53 paiyzy aýylda turady.
Osy jyly Shieli aýdanynyń biýdjeti 17 mlrd. teńgeden asty. Energetika, aýyz sý, gazdandyrý salalarynda júieli jumys júrgizilýde. Shieli elektr júiesiniń qosalqy stantsiiasy 4 mlrd. 480 mln. teńgege tolyqtai jańǵyrtyldy.
Osyndai baiypty bastamalardyń jalǵasy retinde búgin Bestam aýylyndaǵy 429 mln. teńgege salynǵan 150 oryndyq jańa klýbty el igiligine berýge jinaldyq. Aýyldyq klýb mádeni jańǵyrýdyń ortalyǵyna ainalsyn! Qýanyshtaryńyz qutty bolsyn!», – dedi N. Nálibaev.
Shielide jeke investorlar esebinen 6 mlrd. teńgege qýattylyǵy 20 MVt, quny 1 mlrd 500 mln teńge bolatyn kún-elektr stantsiialary salynýda. Aýdan halqy 100 paiyz sapaly aýyz sýmen qamtamasyz etilip,16 eldi meken tabiǵi gazǵa qosylǵan. Juqpaly aýrýlar bólimshesiniń jańa ǵimaraty, aýdandyq aýrýhana janynan qosymsha ǵimarat paidalanýǵa berildi. Onda jańa MRT apparaty ornatylýda. Zamanaýi talaptarǵa sai jabdyqtalǵan bul nysandar turǵyndarǵa sapaly meditsinalyq kómek kórsetip keledi.
Biylǵy oqý jylynda 200 oryndyq «Oqýshylar úii» men 50 oryndyq «Óner mektebi» ashyldy. Jyl sońyna deiin kezektilik reti boiynsha turǵyndarǵa 52 páterlik 26 jańa turǵyn úi tabystalady.
Al búgingi jańa klýbtyń bas merdigeri «Dáneker» JShS, ǵimartta án, hor, bi, qolóner úiirmeleri bolady jáne kitaphana ornalasady. Bul jer aýyl jastarynyń basyn qosatyn, ónerge baýlityn rýhaniiat besigine ainalmaq.
Jiynda aýdannyń áleýmettik-ekonomikalyq damýyna úles qosqan ardagerler men jańa nysandy salǵan qurylysshylar oblys ákiminiń Alǵys hatymen marapattaldy. Eńbek ardageri Áshim Orazbekuly jańa bastamaǵa batasyn berdi.
