Shveitsariiada Ózbekstannyń marqum burynǵy prezidenti Islam Karimovtyń qyzy Gúlnara Karimovaǵa qatysty syrttai sot protsesi bastaldy. Oǵan qylmystyq uiym qurdy, para aldy jáne aqshany zańdastyrdy degen aiyp taǵylyp otyr, dep habarlaidy Dalanews.kz Deutsche Welle basylymyna silteme jasap.
Is Shveitsariia Federaldyq qylmystyq sotynda, Bellintsona qalasynda 27 sáýir kúni qarala bastady. Málimetke sáikes, sot protsesi 22 mamyrǵa deiin jalǵasýy múmkin.
53 jastaǵy Gúlnara Karimova sot otyrysyna qatysa almaidy. Sebebi ol qazir Ózbekstandaǵy koloniiada jazasyn ótep jatyr. Onyń advokattarynyń biri Gregýar Manjea qorǵaý tarapy klientin tolyq aqtaýǵa kúsh salatynyn málimdedi.
Shveitsariia prokýratýrasy oǵan qarsy aiypty 2023 jyldyń kúzinde jariialaǵan. Tergeý nusqasy boiynsha, ol ondaǵan adam men kóptegen kompaniiadan turǵan «Ofis» atty qylmystyq topty quryp, basqarǵan.
Prokýrorlar Gúlnara Karimova Shveitsariiada jáne ózge elderde qylmystyq jolmen kelgen júzdegen million dollardy ornalastyrdy dep sanaidy. Sondai-aq qolma-qol aqsha, zergerlik buiymdar jáne zańsyz tabylǵan ózge de qundylyqtardy saqtaýdy uiymdastyrdy degen kúdik bar.
Tergeý dereginshe, Ózbekstannyń telekommýnikatsiia naryǵyna kirgisi kelgen sheteldik kompaniialar Karimovamen bailanysy bar qurylymdarǵa para berýge májbúr bolǵan. Aiyptaý qorytyndysynda bul uiym 2005 jyldan beri Shveitsariiada jumys istegeni, al qylmystyq áreketter keminde 2013 jylǵa deiin jalǵasqany aitylǵan.
2024 jyldyń qarashasynda Lombard Odier banki men onyń burynǵy qyzmetkerine de aiyp taǵyldy. Tergeýshiler olar «Ofis» tobynyń qylmystyq tabysyn jasyrýda sheshýshi ról atqardy dep esepteidi.
Al bank ókilderi prokýratýra olardyń aqshany ádeii jylystatty dep aiyptamaitynyn, másele tek ishki baqylaý júiesindegi boljamdy uiymdastyrýshylyq kemshilikterge qatysty ekenin aityp, sotta óz ustanymyn qorǵaitynyn jetkizdi.
