Shýdyń depýtattar marapattaldy
Jiyn barysynda aýdandyq máslihat hatshysy Erjan Ómiráliev jinalǵan qaýymdy Qazaqstan Respýblikasynyń jergilikti ókildi organdary – máslihattarǵa 25 jyl tolýymen quttyqtap, izgi tilegin jetkizdi. Sondai-aq, ol óz sózinde máslihattyń yqpalymen 25 jyl ishinde halyq igiligi úshin qyrýar jumystar atqarylǵandyǵyn tilge tiek etip, sol tyndyrymdy tirlikterdiń asa mańyzdy tustaryna toqtalyp, oǵan belsendi úles qosqan azamattardyń esimderin atap ótti. Bul tusta ásirese, áleýmettik salaǵa basymdyq berilip, nátijesinde óńir halqynyń turmys sapasy artyp, bul óz kezeginde jumyssyzdyq deńgeiiniń tómendeýine yqpal etkendigin aita ketken jón. Sonymen qatar, aýdandyq máslihattyń, bir kezderi laiyqty deńgeide qyzmet atqarǵan qalalyq máslihattyń damý tarihyn qysqasha málimdep, qol jetkizgen jetistikterdi de nazardan tys qaldyrmady. Sóz sońynda aýdandyq máslihat, onyń ishinde depýtattyq korpýs aldaǵy ýaqytta da qoldanystaǵy zańdylyqtardy basshylyqqa ala otyryp, aýdan ómirin órkendetýge barynsha yqpal jasai beretindigin jetkizdi.
Saltanatty sátte Erjan Kórikbaiuly birneshe adamǵa «Qazaqstan Respýblikasynyń máslihattaryna 25 jyl» merekelik medalin tabys etýdi eń birinshi shaqyrylymnyń depýtaty, Shý aýdanynyń Qurmetti azamaty, búginde 88 jastaǵy zeinetker I.Alievten bastady. Marapattalýshylar qatarynda aldyńǵy shaqyrylymdarda eki-úsh retten qatar depýtat bolǵan zeinetkerlerlermen qatar, aǵa býyn ókilderiniń ónegeli izin jalǵaǵan qazirgi tańdaǵy oblystyq jáne aýdandyq máslihat depýtattary da boldy. Aita ketetin jáit, buǵan deiinde dál osyndai medalmen aýdandyq máslihatta ótken sessiia barysynda birneshe jerlesterimiz marapattalǵan bolatyn.
Merekelik medal aýdan ákimi Q.Á.Dosaevqa da tabystaldy. Quttyqtaý sózin sóilegen aýdan basshysy óz sózinde óńirde túrli investitsiialyq jobalardyń júzege asyrylýy, aýdandyq biýdjet kóleminiń artýy halyqtyń turmys sapasynyń artqandyǵyn ańǵartatyndyǵyn aityp, bul tusta aýdandyq máslihat tarapynan atqarylǵan igilikti ister aldaǵy ýaqytta da ózara aýyzbirshilik arqyly oń baǵytpen jalǵasa beredi degen senimin bildirdi.
Shara barysynda aýdandyq máslihattyń úshinshi shaqyrylymynyń depýtaty, zeinetker, aýdandyq qoǵamdyq keńes múshesi J.Ospanov, altynshy shaqyrylymnyń depýtaty, zeinetker A.Moldashevalar da quttyqtaý sóz sóilep, izgi tilekterin jetkizdi.
Jambyl oblysy
Shý aýdany
