Shý aýdany ákimi Dosaev stýdenttermen kezdesti
Kezdesý barysynda Ǵaliia Ádilqyzy máni zor sharanyń maqsaty birinshi kezekte jastardy patriot bolýǵa baýlý ekendigin atap ótip, sharany beiresmi, iaǵni erkin formattaǵy pikir almasý alańy retinde jalǵaý úshin sózdi aýdan basshysyna berdi. Qairat Áskerbekuly óz sózin qazirgi kezde jastarǵa memleket tarapynan jan-jaqty jaǵdai jasalyp jatqandyǵyn aitýdan bastady.
– Ár el keleshegin jastarmen bailanystyryp, olardy «bolashaqtyń tutqasy» dep esepteidi. Sondyqtan jastardyń molshylyqta, esh alańsyz ómir súrýi úshin bar jaǵdai jasalady. Bizdiń memlekette de dál solai. Bul rette 30-ǵa jýyq jyl boiy elimizde óskeleń urpaq igiligi úshin atqarylǵan jumystar kól-kósir ekenin aitpasa da túsinikti. Búginde jas qazaqstandyqtardyń álemniń kez kelgen elindegi qatarlasymen terezesi teń. Jastar tarapynan tek bilim alýdan jalyqpaý ǵana talap etiledi, – degen aýdan basshysy jastardy bir ǵana jetistikpen toqtalmai, bilimdi shyńdai berýge shaqyrdy.
Qazirgi ýaqyt jańa tehnologiianyń qaryshtap damyǵan kezeńi bolǵandyqtan, jastardan tyń ideia kútiledi. Osyǵan orai, búgingi kúni aýdandaǵy bilim berý mekemelerinde IT synyptary ashylyp, oqýshylarǵa robottarmen jumys jasaý úiretilýde. Bul jańashyldyqtan kolledj stýdentteri de syrt qalmas úshin Qairat Áskerbekuly qyzyǵýshylyq tanytqan stýdetterge mektepterdegi robototehnika synyptarynyń esigi árkez aiqara ashyq ekendigin jetkizdi.
Aýdan ákimimen kezdesken jastar óz kezeginde túrli saýaldaryn qoidy. Suraqtar kóbine innovatsiialyq jobalar men ideialar, jastardyń kásippen ainalysýyna jaǵdai týǵyzý jáne taǵy da basqa baǵyttarda boldy. Máselen, atalmysh kolledjdiń stýdentteri B.Boranbai men I.Ádilhanov «Serpin-2050» baǵdarlamasyna qatysýǵa qyzyǵýshylyq tanytatyndaryn jetkizse, Á.Qojan bolashaqta jeke kásippen ainalysyp, aýdannyń aýylsharýashylyǵy salasynyń damýyna óz úlesin qosatyndyǵyn aitty. Keleli ótken kezdesý sońynda kolledj direktory T.Musaeva aýdan basshysyna kolledj ujymy men stýdentter atynan alǵys bildirdi.
