Byltyr basy daýdan arylmai qoiǵan Mádeniet jáne sport ministri Arystanbek Muhamediuly Shýchinsk qalasyndaǵy respýblikalyq shańǵy sporty bazasyna tramplin salyp, ony 2016 jyly paidalanýǵa berýge ýáde etken bolatyn. Alaida, biýdjettiń milliardtaǵan qarjysy jumsalǵan osynaý nysan saqaldy qurylysqa ainalyp, álige deiin aiaqtalmai tur.
Búgin ministrge saýal joldaǵan Májilis depýtaty Daniia Espaeva atalǵan tramplinniń quny bastapqy baǵasynan úsh esege deiin óskenin aitty. Soǵan qaramastan, nysan ýáde etilgen ýaqytta paidalanýǵa berilgen joq.
"2015 jyldyń mamyr aiynda siz (QR Mádeniet jáne sport ministri - Avt.) bylai aitqan edińiz: "Nysan qazir 90 paiyzǵa daiyn. Tek tramplindi aiaqtaý kerek". Sol sózińizde 2016 jyldyń 1 qańtarynda nysandy paidalanýǵa berýge ýáde berdińiz. Keiin 2016 jyldyń 23 aqpanynda Shýchinsktegi halyqaralyq shańǵy sporty ortalyǵy jyl sońyna deiin paidalanýǵa beriledi dep taǵy ýáde berdińiz. Al, 2016 jyldyń qyrkúiek aiynda ministrlik atalǵan jobanyń biýdjetin taǵy 23 mlrd teńgege ulǵaitty. Eger nysan qurylysy 90 paiyzǵa aiaqtalǵan bolsa sonshama kóp qarajatty qaida jumsadyńyzdar? Qalǵan 10 paiyzdy aiaqtaý úshin jobanyń negizgi qunynan taǵy 2,5 esege kóp qarajat rasymen de qajet boldy ma?", - dedi depýtat óz saýalynda.
Daniia Espaevanyń aitýynsha, qurylysy 2005 jyly bastalǵan jobanyń alǵashqy quny 9 mlrd 346 million teńgeni quraǵan eken. 2008 jyly ol aiaqtalýy tiis bolatyn. Alaida, 2009 jyly biýdjetke túzetý engizilip, jobanyń quny 15 mlrd 244 mln teńgege ulǵaidy. Al, biýdjettik komissiianyń sheshimimen 2016 jyldyń qyrkúieginde jobalyq-smetalyq qujatqa taǵy ózgertýler engizilip, nysan quny 38 mlrd 531 million teńgege ósken. Osylaisha, bir ǵana tramplinniń qurylysyna ketken qarajatqa 30 mektep pen aýrýhana salýǵa bolar edi.
Derekkóz: SN.kz
