Shyǵys Qazaqstan oblysy, Glýbokoe aýylynyń turǵyny radiatsiialyq qaýipti aimaqta turǵanyn sotta dáleldep, ýákiletti organnyń ádiletsiz sheshimin joqqa shyǵardy, dep habarlaidy Dalanews.kz.
Yk.kz málimetinshe, quzyrly mekeme onyń ótinishin tiisti qujattardyń joqtyǵyna bailanysty qanaǵattandyrmaǵan.
Alaida “Semei iadrolyq synaq poligonynda iadrolyq jarylystardyń saldarynan zardap shekken azamattardy áleýmettik qorǵaý týraly” Zańǵa sáikes, 1966 jyldan 1990 jylǵa deiingi aralyqta atalǵan aýmaqta turyp, jumys istegen nemese áskeri qyzmet atqarǵan (onyń ishinde merzimdi) azamattar zardap shekken tulǵalar retinde tanylady. Olarǵa jeńildikter men ótemaqy alýǵa quqyq beretin arnaiy kýálik tabystalady.
Shyǵys Qazaqstan oblysy Glýbokov aýdanynyń soty bul isti qarap, talapkerdiń 1990 jyldyń ishinde Beloýsovka aýylynda segiz ai turǵanyn rastaityn jetkilikti dálelder bar degen sheshimge keldi. Bul óńir resmi túrde radiatsiialyq qaýipti aimaqqa jatqyzylady.
Sotta talapkerdiń anasynyń Beloýsovka aýylynda turǵanyn dáleldeitin týý týraly kýálik, AHAJ jazbalary, balalar úiinen alynǵan anyqtama, sondai-aq ápkesi men aǵasynyń kýálikteri usynyldy. Olar talapkerdiń týǵanynan bastap balalar úiine túskenge deiin ata-anasymen birge osy aýylda turǵanyn rastaǵan.
Nátijesinde sot talapty qanaǵattandyryp, talapkerdiń 1990 jyly Semei iadrolyq synaq poligonynyń áserine ushyraǵan aimaqta segiz ai turǵan faktisin resmi túrde moiyndady.
Atalǵan sheshim áli zańdy kúshine engen joq.
