Shyǵys Qazaqstan oblysy ákimi Nurymbet Saqtaǵanov sý tasqyny qaýpi joǵary Katonqaraǵai men Altai aýdandarynda áýe sholýyn júrgizdi. Ol tótenshe jaǵdailar qyzmeti, jumyldyrý daiyndyǵy basqarmasy jáne ózge de sala mamandarymen birge ózender men sý qoimalarynyń jai-kúiin tekserdi, – dep habarlaidy Dalanews.kz ShQO ákiminiń baspasóz qyzmetine silteme jasap.
Aýdandarda qardyń erýi kúsheiip, qar qory qalypty mólsherden 10-20%-ǵa artyq ekeni anyqtaldy. Máselen, Altai qalasy mańynda qar qalyńdyǵy 1 metrden assa, taýly aimaqtarda 250 mm-ge deiin jetedi. Bul qardyń sý qory shamamen 500 mm-di quraidy. Al Katonqaraǵai aýdanynda qar biiktigi 30-50 sm aralyǵynda bolsa, sý qory 100 mm shamasynda.
Gidrologiialyq jaǵdai ázirge turaqty. Buqtyrma ózeninde muz jarylý protsesi bastalǵanymen Buqtyrma sý qoimasynda áli de muz tolyq saqtalǵan. Oblys basshylyǵy jaǵdaidy qatań baqylaýda ustap otyr.
Sonymen qatar, oblys ákimi Katonqaraǵai aýdanynda bolyp, ákimdik, politsiia jáne sot ǵimarattarynyń jóndeý jumystarymen tanysty. Sondai-aq ol qurylys jumystary uzaqqa sozylǵan dene shynyqtyrý-saýyqtyrý keshenin aralady.
Basseini bar bul keshenniń qurylysy 2020 jyly bastalǵanymen, merdiger kompaniialardyń salǵyrttyǵynan áli kúnge deiin tolyq aiaqtalmaǵan. Qazirgi ýaqytta jumystar 75%-ǵa oryndaldy.
Tehnikalyq qadaǵalaý anyqtaǵan aqaýlardy merdiger túzetip jatyr. Bassein kesheninde jylytý jáne jeldetý júieleri ornatyldy. Basseinde synaq jumystary júrgizilip, jattyǵý zalyna barlyq qajetti sport jabdyqtary jetkizildi.
Nysan belgilengen merzimde paidalanýǵa beriledi.
