Áleýmettik jelidegi tikelei efir barysynda ShQO ákimi Danial Ahmetov óńirdegi mektepterde 33 200 kompiýter bar ekenin atap ótti.
Oqýshylardyń 88 paiyzy úi jaǵdaiynda kompiýtermen qamtamasyz etilgen. Al 22,4 myń balanyń onlain rejimde bilim alýyna tehnikalyq jaǵdai jasalmaǵan. Sondyqtan 17 myńnan astam oqýshyǵa, eń aldymen áleýmettik jaǵynan az qamtylǵan otbasylarda tárbielenip jatqan balalarǵa mektepterdegi kompiýterler beriledi. Keiin olar kompiýterdi mektepke qaitaryp berýi tiis.
Sondai-aq 197 pedagog qajetti tehnikamen qamtamasyz etilmek. «Kóp jaǵdaida bir otbasy músheleri 1 kompiýter qoldanady. Ol januianyń ata-anasy qashyqtan jumys istep otyrýy da múmkin. Sol sebepti bir kompiýterdiń azdyq etetini túsinikti. Atalǵan másele mektep ákimshilikterinde jiti talqylanady.
– 25 tamyzǵa deiin oblys mektepterine qosymsha 9,5 myń birlik kompiýter satyp alamyz. Sonymen qatar úkimettik qordan 26,5 myń birlik tehnika alýǵa qarajat bólý qarastyrylyp otyr. Bul qarjy balalar men pedagogterge qajetti tehnikany áperýge jetkilikti, – dedi Danial Ahmetov. Ákimniń aitýynsha, internet máselesi de sheshimin tabady.
Búginde 189 myń oqýshynyń 18,3 myńy ǵalamtormen qamtamasyz etilmegen. Osy máseleni sheshý úshin balalarǵa SIM-kartalar men tarifter qosylǵan joǵary jyldamdyǵy bar 5 620 roýter beriledi.
Qalǵan 6 877 bala shtattyq rejimde bilim alatyn bolady. Budan bólek, mektep jasyndaǵy balalar turatyn barlyq eldi mekende internet jelisiniń jyldamdyǵy arttyrylmaq. Aimaq basshysynyń aitýynsha, 2020 jyldyń 1 qyrkúiegine deiin 52 eldi mekendegi internet jelisiniń jyldamdyǵy joǵarylaidy.
