تاياۋدا شىعىس قازاقستان اكىمى دانيال احمەتوۆ الەۋمەتتىك جەلى ارقىلى تىكەلەي ەفيرگە شىعىپ، وڭىردە مۇعالىمدەر مەن وقۋشىلاردى كومپيۋتەرمەن قامتاماسىز ەتۋ ماقساتىندا ساراپتاما جاسالىنىپ، جاڭا وقۋ جىلىنا دايىندىق قىزۋ ءجۇرىپ جاتقانىن العا تارتتى.

الەۋمەتتىك جەلىدەگى تىكەلەي ەفير بارىسىندا شقو اكىمى دانيال احمەتوۆ وڭىردەگى مەكتەپتەردە 33 200 كومپيۋتەر بار ەكەنىن اتاپ ءوتتى.

وقۋشىلاردىڭ 88 پايىزى ءۇي جاعدايىندا كومپيۋتەرمەن قامتاماسىز ەتىلگەن. ال 22،4 مىڭ بالانىڭ ونلاين رەجيمدە ءبىلىم الۋىنا تەحنيكالىق جاعداي جاسالماعان. سوندىقتان 17 مىڭنان استام وقۋشىعا، ەڭ الدىمەن الەۋمەتتىك جاعىنان از قامتىلعان وتباسىلاردا تاربيەلەنىپ جاتقان بالالارعا مەكتەپتەردەگى كومپيۋتەرلەر بەرىلەدى. كەيىن ولار كومپيۋتەردى مەكتەپكە قايتارىپ بەرۋى ءتيىس.

سونداي-اق 197 پەداگوگ قاجەتتى تەحنيكامەن قامتاماسىز ەتىلمەك. «كوپ جاعدايدا ءبىر وتباسى مۇشەلەرى 1 كومپيۋتەر قولدانادى. ول جانۇيانىڭ اتا-اناسى قاشىقتان جۇمىس ىستەپ وتىرۋى دا مۇمكىن. سول سەبەپتى ءبىر كومپيۋتەردىڭ ازدىق ەتەتىنى تۇسىنىكتى. اتالعان ماسەلە مەكتەپ اكىمشىلىكتەرىندە ءجىتى تالقىلانادى.

– 25 تامىزعا دەيىن وبلىس مەكتەپتەرىنە قوسىمشا 9،5 مىڭ بىرلىك كومپيۋتەر ساتىپ الامىز. سونىمەن قاتار ۇكىمەتتىك قوردان 26،5 مىڭ بىرلىك تەحنيكا الۋعا قاراجات ءبولۋ قاراستىرىلىپ وتىر. بۇل قارجى بالالار مەن پەداگوگتەرگە قاجەتتى تەحنيكانى اپەرۋگە جەتكىلىكتى، – دەدى دانيال احمەتوۆ. اكىمنىڭ ايتۋىنشا، ينتەرنەت ماسەلەسى دە شەشىمىن تابادى.

بۇگىندە 189 مىڭ وقۋشىنىڭ 18،3 مىڭى عالامتورمەن قامتاماسىز ەتىلمەگەن. وسى ماسەلەنى شەشۋ ءۇشىن بالالارعا SIM-كارتالار مەن تاريفتەر قوسىلعان جوعارى جىلدامدىعى بار 5 620 روۋتەر بەرىلەدى.

قالعان 6 877 بالا شتاتتىق رەجيمدە ءبىلىم الاتىن بولادى. بۇدان بولەك، مەكتەپ جاسىنداعى بالالار تۇراتىن بارلىق ەلدى مەكەندە ينتەرنەت جەلىسىنىڭ جىلدامدىعى ارتتىرىلماق. ايماق باسشىسىنىڭ ايتۋىنشا، 2020 جىلدىڭ 1 قىركۇيەگىنە دەيىن 52 ەلدى مەكەندەگى ينتەرنەت جەلىسىنىڭ جىلدامدىعى جوعارىلايدى.