Biylǵy Ulttyq quryltaida Memleket basshysy Qasym-Jomart Toqaev infraqurylymdyq máselelerge erekshe nazar aýdarǵan bolatyn. Sonyń ishinde halyqty kógildir otynmen qamtamasyz etýdiń mańyzy atap ótildi.
Shyǵys Qazaqstan oblysy ákimdiginde ótken kezekti keńeste óńirdiń eldi mekenderin gazdandyrý baǵytynda atqarylyp jatqan jumystar saralanyp, bolashaqta iske asyrylatyn jobalar talqylandy.
Oblystyq energetika jáne turǵyn úi kommýnaldyq sharýashylyq basqarmasynyń aqparatyna súiensek, 2024 jylǵy 1 qańtardaǵy jaǵdai boiynsha Shyǵys Qazaqstanda gazdandyrý kórsetkishi 3,18 paiyz ǵana bolǵan, iaǵni 23,1 myń adam ǵana tabiǵi gazben qamtylǵan. Onda da ázirge kógildir otynnyń qyzyǵyn bir ǵana aýdan kórip otyr. Ol – Zaisan aýdany.
Mamandardyń boljamynsha, Zaisandaǵy otyn qory 325 million tekshe metr shamasynda. Bul ary ketse on jylǵa jetetin qor. Al oblystyń basqa aýdandary men qalalaryna gaz qashan jetetini ázirge belgisiz. Basqany qoiyp, gaz kenishi bar Zaisannyń ózinde kógildir otynnyń igiligin kóre almai otyrǵan aýyldar bar.
Osy oraida oblys basshylyǵy el Prezidentiniń tapsyrmasyna sáikes óńir turǵyndaryn sapaly tabiǵi gazben qamtýǵa baǵyttalǵan birneshe jobany zerdelep, júzege asyrýdy kózdep otyr.
Osydan biraz buryn Shyǵys Qazaqstanǵa jumys saparymen kelip qaitqan energetika vitse-ministri Suńǵat Esimhanov Shyǵys Qazaqstanǵa kógildir otyn jetkizýdiń eki joly qarastyrylyp jatqanyn habarlaǵan bolatyn. Onyń biri Rýdnyi – Astana – Pavlodar – Semei – Óskemen – Zaisan baǵytynda batys óńirlerden gaz tartý. Bul jobanyń quny shamamen – 778 milliard teńge. Ekinshi jol – kórshi Reseidiń gazyna qosylý. Bul nusqa boiynsha Resei Federatsiiasy – Qazaqstan – Qytai Halyq Respýblikasy baǵytynda gaz qubyry túspek. Qazir bizdiń mamandar reseilik áriptesterimen birlesip tehnikalyq-ekonomikalyq negizdeme ázirleý úshin jobany jan-jaqty zerttep, zerdelep jatyr.
– Bolashaqta soltústik-shyǵys óńirlerdi gazdandyrý úshin tranzittik gaz qubyryn salý sharttaryn talqylaý jóninde kelissózder júrgizilýde. Barlyq bastapqy derekterdi alǵannan keiin gazdandyrýdyń eń tiimdi nusqasy ázirlenetin bolady, – dep málim etti energetika vitse-ministri.
