Búgin Shyǵys Qazaqstan oblysy Ulan aýdanyndaǵy "Búrkit tóbe" alańynda 3 kúnge sozylǵan halyqaralyq "Shyǵys Salbýryny-2025" festivali aiaqtaldy.
Marapattaý rásimine ShQO ákimi Nurymbet Saqtaǵanov, QR Týrizm jáne sport ministri Erbol Myrzabosynov, respýblikalyq "Qusbegilik" federatsiiasynyń vitse-prezidentteri Baǵdat Múptekeqyzy men Janjigit Omarhan qatysty.
"Bul oblys úshin ǵana emes, elimiz úshin mańyzy zor festival. Úsh kún boiy «Búrkit tóbe» alańynyń kórkin sporttyq básekeler qyzdyryp, qatysýshylar dostyq pen birliktiń naǵyz úlgisin kórsetti. Altai men Tarbaǵataidyń asqaq shyńdary men keń dalasynda qyran qus salý – ata-babamyzdan jalǵasqan kóne dástúrdiń biri. Saiatshylyq ónerdiń álemdik deńgeide moiyndalyp, ulttyq brendke ainala bastaýy halqymyzdyń urpaqtan-urpaqqa jalǵasqan baǵa jetpes murasynyń máńgilik qundylyq ekenin aiǵaqtaidy", - dedi Nurymbet Saqtaǵanov.
"Shyǵys Salbýryny" Halyqaralyq festivali biyl besinshi márte uiymdastyrylyp otyr.
Oǵan Qytai, Resei, Ispaniia, Majarstan, Mońǵoliia, Qyrǵyzstan jáne elimizdiń ár óńirinen 100-den astam sportshy qatysty. Al jalpy jinalǵan jurttyń sany 10 myńǵa jetti. Sondai-aq "Búrkit tóbe" alańynda 40 kiiz úiden quralǵan etnoaýyl tigildi. Qonaqtar úshin qolóner sheberleriniń kórmeleri men sheberlik sabaqtary uiymdastyrylyp, qazaqtyń kóne salt-dástúrleri, atap aitqanda betashar, tusaýkeser, besikke salý jáne basqa da ǵuryptar kórsetildi.
Kontsert qoiylyp, onda Kenjebek Janábilov, Dosymjan Tanatarov, "Alataý serileri" toby jáne óńirge tanymal basqa da ánshiler óner kórsetti.
Tartysty ótken festival qorytyndysyna sáikes itelgi saiysy boiynsha Erlan Kenjetaev (Aqmola oblysy), qarshyǵa jáne búrkit saiystarynda Ómirhan Baetbai (Almaty oblysy) jeńimpaz atandy. Ár júldegerge aqshalai syilyq tabystaldy.
