Mektep oqýshylary bar kóp balaly otbasylar formamen, aıaq kıimmen jáne tamaqpen qamtamasyz etiledi. Balalardyń ata-analary mektepke deıingi balalar mekemelerine aqy tóleýden bosatylǵan. Al tehnıkalyq jáne kásibı bilim alatyn stýdentterge tegin tamaqtaný jáne turý usynylady.
Oblys ákimdiginiń málimetinshe, az qamtylǵan jáne kóp balaly otbasylardan shyqqan balalardyń qoǵamdyq kólikte jol júrýin qamtamasyz etý úshin 340,7 mln teńge qarajat bólingen.
Árdaıym ózekti turǵyn úı máselesi de josparly túrde óz sheshimin tabýda. Tabys deńgeıi tómen halyqty qoldaý úshin turǵyn úı sertıfıkattaryn tabystaý sharalary kózdelgen. 2021 jyldyń basynan beri 204 otbasy 204 mln teńgege turǵyn úı sertıfıkatyn alǵan.
Sonymen qatar, oblysta osy sanattaǵy otbasylardy turǵyn úımen qamtamasyz etýdiń kezeńdik baǵdarlamasy júzege asyrylýda.
Byltyr kezekte turǵan kóp balaly analar men áleýmettik osal otbasylar úshin 9 mlrd teńgege 394 úı berildi. Osylaısha, 681 otbasy qonys toıyn toılady.
Sonymen qatar, 2021 jyly kópbalaly otbasylarǵa jeńildik sharttarymen 438 mln teńgege 160 shaǵyn nesıe berildi. Nátıjeli jumyspen qamtýdy jáne jappaı kásipkerlikti damytýdyń "Eńbek" memlekettik baǵdarlamasynyń qatysýshylary 32 myń adam boldy. Onyń 27 myń adamy jumys tapsa, 17 myń adam turaqty jumysqa ornalastyryldy. Sonymen qatar, suranysqa ıe mamandyqtar boıynsha qysqa merzimdi oqytýdan 1,2 myń adam ótti.
Eńbek resýrstarynyń utqyrlyǵyn arttyrý aıasynda byltyr óńirge 645 adam kóshirilip ákelendi.
Áleýmettik qamsyzdandyrý nysandaryn jóndeýge kóńil bólinýde. Máselen, Óskemen, Semeı, Rıdder qalalarynda, Borodýlıha, Tarbaǵataı, Úrjar, Shemonaıha aýdandarynda jáne Altaı aýdanynda kúrdeli jáne aǵymdaǵy jóndeý jumystary júrgizildi. Jalpy soma 147 mln teńgeni qurady.
