Jalpy, óńirde 77,4 mlrd. teńgege 817 infraqurylymdyq jobany iske asyrý kózdelgen. Bul rette jumyssyz júrgen jastar men stýdentterge basymdyq berilýde. Oblystyq jumyspen qamtý jáne áleýmettik baǵdarlamalardy úilestirý basqarma basshysynyń orynbasary Doshan Qaiyrǵazinovtyń aitýynsha, aimaqtaǵy árbir qala men aýdandarda atalmysh baǵdarlama aiasynda myńdaǵan jas jumysqa ornalasyp, turaqty tabys kózine qol jetkizdi.
– Aǵymdaǵy qurylys-jóndeý jumystaryna, infraqurylymdyq nysandarǵa tartylǵan jastar turaqty jalaqyǵa jol jetkizdi. Olardyń ishinde buǵan deiin múlde resmi túrde jalaqy almaǵandary da bar. Bul baǵdarlamanyń tiimdiligi de osy. Jumyssyz jastarymyz jumyspen qamtylyp, shetten jumysqa tartý faktileri tómendeitin bolady, - deidi basqarma ókili.
Osyndai jastyń biri Rashid Diýsiýpov, aýyldan oblys ortalyǵyna kelip, baǵdarlama aiasynda balabaqshanyń jóndeý jumysyna ornalastyryldy. – Men aýylda neshe jyldan beri jumyssyz júrdim. Aýyldaǵy sharýa qojalyqtarynda azyn-aýlaq jumys istep, tabys taýyp júrgem. Al qazir «Darstroi» firmasyna jumysqa ornalasyp, óz mamandyǵym boiynsha eńbek etýdemin, - deidi.
Oblysta suranysqa ie qurylysshylar men osy salaǵa qatysy bar mamandar jáne elektrler, jol jóndeýshiler jumyspen qamtý ortalyqtary arqyly jumyspen qamtylýda. Qala jáne aýdandardaǵy jumyspen qamtý ortalyqtary jumys berýshilermen tyǵyz bailanys ornatyp, biryńǵai memlekettik enbek.kz portalynda eńbekke ornalasqandardy tirkeýde. Ol naqty sandar kórsetkishine múmkindik beredi. Iaǵni qansha adam jumysqa ornalasyp, qai aýdandarda basymdyq baryn kórýge bolady deidi mamandar.
Aimaqta jumyspen qamtý ortalyqtarynyń joldamasy boiynsha 9 myńǵa jýyq adam jumys ornymen qamtyldy, onyń úshten biri jastar. Jyl sońyna deiin taǵy qosymsha eki myńǵa jýyq jumys ornyn ashý jospary bar.
