ShQO-da buzaqylyq jasaǵan sýdia jazadan qutylyp ketti, dep habarlaidy Dalanews.kz.
Bir jyl buryn Óskemen qalasynda Mamandandyrylǵan aýdanaralyq ekonomikalyq sottyń tóraǵasy Ernar Erbolatovtyń ustalǵany belgili boldy. BAQ málimetinshe, ol kólikterdi zaqymdady jáne quqyq buzýshylyqty toqtatýǵa tyrysqan adamdarǵa qarsylyq kórsetti degen kúdikke ilingen.
Sot protsesi 2024 jyldyń jazynda bastaldy.
Shyǵys Qazaqstan oblysy prokýrorynyń orynbasary Erlan Andabaev Nege.aqsha-nyń resmi saýalyna jaýap retinde sot otyrysynyń basynda sottalýshy Erbolatov pen jábirlenýshiler taraptardyń tatýlasýyna bailanysty isti toqtatý týraly ótinish bildirgenin habarlady. Sot bul ótinishti ári qarai sot talqylaýyn ótkizbesten qanaǵattandyrdy.
«Aita ketý kerek, memlekettik aiyptaýshy isti toqtatýǵa qarsy boldy. Alaida, 2024 jylǵy 6 tamyzda Óskemen qalasynyń №2 sotynyń qaýlysymen Erbolatov E. Qylmystyq kodekstiń 293-baby, 2-bóligi boiynsha qylmystyq jaýapkershilikten bosatylyp, qylmystyq is Qylmystyq is júrgizý kodeksiniń 35-baby, 1-bóligi, 12-tarmaǵy jáne Qylmystyq kodekstiń 68-baby, 3-bóligi negizinde toqtatyldy», – dep habarlady prokýratýra.
Sot sheshimimen kelispegen prokýror qaýlynyń kúshin joiyp, qylmystyq isti máni boiynsha jańa sot talqylaýyna jiberý týraly ótinish jasady. Alaida, ShQO qylmystyq ister jónindegi sot alqasy 26 tamyzda birinshi satydaǵy sottyń qaýlysyn ózgerissiz qaldyrdy.
Aita keteiik, qazir ShQO Mamandandyrylǵan aýdanaralyq ekonomikalyq sotynyń resmi saitynda tóraǵa mindetin atqarýshy retinde basqa adam – Tólegen Turǵambaev kórsetilgen.
