Sońǵy 5 jylda elimizde 16 apatty dep tanylǵan sý qoımasy jóndeldi. Shyǵys Qazaqstan oblysynda 2023 jyldyń sońyna deıin 2 apatty sý qoımasyn qalpyna keltirý josparlanýda. Olar – Zaısan aýdanyndaǵy Úıdene sý qoımasynyń qurylymdaryn qaıta jańǵyrtý jáne Tarbaǵataı aýdanyndaǵy Qarǵyba ózenindegi bógetti qaıta jańǵyrtý. Bul týraly baspasóz máslıhatynda Ekologıa jáne tabıǵı resýrstar mınıstri Zúlfıa Súleımenova málimdedi.

Al orman sharýashylyǵy salasynda Prezıdenttiń 2 mıllıard aǵash otyrǵyzý jónindegi bastamasymen eki jylda 1300 gektar aýmaqqa 6,1 mıllıon kóshetter egildi.

– Bıyl Shyǵys Qazaqstanda 1,5 myń gektar aýmaqqa 8 mıllıon aǵash otyrǵyzý josparlanýda. Bıylǵy kóktemgi orman sharýashylyǵy jumystary bastalǵaly 40 gektar aýmaqqa 196 myń túp aǵash otyrǵyzyldy, – dedi mınıstr.

Ol sondaı-aq mınıstrliktiń balyq sharýashylyǵyn damytý boıynsha jumys júrgizip jatqanyn aıtty. 2030 jylǵa deıin Shyǵys Qazaqstan oblysynda balyq ósirý kólemin 9,7 myń tonnaǵa jetkizý josparlanýda.

– Baǵdarlamaǵa sáıkes 2023 jyly 2846 tonna balyq ósirý josparlanýda. Bıylǵy jyldyń 1 toqsanynda 769 tonna taýarlyq balyq ósirildi. Al jyl sońyna deıin Óskemen jáne Buqtyrma sý qoımalarynda baǵaly balyq ósirý úshin balyq sharýashylyǵy qurylady, – dep túıindedi óz sózin Zúlfıa Súleımenova.