Ata Zańymyzdyń 30 jyldyq mereitoiy qarsańynda Glýbokoe aýdanynyń Verhneberezovskii aýylynda saltanatty túrde otbasylyq dárigerlik ambýlatoriia ashyldy. Sondai-aq Ývarovo aýylynda feldsherlik-akýsherlik pýnkt paidalanýǵa berildi,- dep habarlaidy Dalanews.kz
Eki nysan da Shyǵys Qazaqstan oblysynda júzege asyp jatqan «Aýyldyq densaýlyq saqtaýdy jańǵyrtý» ulttyq pilottyq jobasy aiasynda salyndy.
– Ambýlatoriia sanitarlyq-epidemiologiialyq baqylaýdyń barlyq normativtik-quqyqtyq talaptaryna sai keledi jáne aýyl turǵyndaryna tolyqqandy ári sapaly meditsinalyq kómek kórsetýge arnalǵan zamanaýi qural-jabdyqtarmen qamtylǵan, – dedi Glýbokoe aýdandyq aýrýhanasynyń bas dárigeri Mirhat Ývazyrov.
Ambýlatoriianyń jobalyq qýaty – aýysymyna 25 adamdy qabyldaidy. 4 oryndyq kúndizgi statsionar qarastyrylǵan. Aýdany 440 sharshy metrdi quraityn nysanda 23 kabinet bar. Fizioterapiia jáne emdik dene shynyqtyrý bólmeleri, zamanaýi videokolposkoppen jabdyqtalǵan akýsherlik-ginekologiialyq kabinet, qaqyryq jinaýǵa arnalǵan jeke kabinet pen tis dárigeriniń bólmesine deiin jobalanǵan.
Mirhat Ývazyrovtyń aitýynsha, buǵan deiin aýylda tolyqqandy ambýlatoriialyq ǵimarat bolmaǵan. 1951 jyly salynǵan eski ǵimarat apatty jaǵdaida dep tanylyp, 2018 jyldan beri dárigerler halyqty tehnikalyq kolledj ǵimaratynda qabyldap keldi. Endi aýyl turǵyndary meditsinalyq qyzmetti jańa, jaily ári zamanaýi ǵimaratta ala alady.
Verhneberezovskii aýylynda 1900 adam tursa, 330 naýqas arteriialyq gipertoniia, 110 adam qant diabeti boiynsha dinamikalyq baqylaýda tur. Budan bólek múmkindigi shekteýli 70 adam bar. Jańa ǵimarat olardyń qajettilikterin eskere otyryp jabdyqtalǵan.
Saltanatty ashylý rásimine qatysqan oblystyq Dostyq úii janyndaǵy ANK Aqsaqaldar keńesiniń tóraǵasy, Glýbokoe aýdanynyń Qurmetti azamaty Dúisembai Úrimbaev aýyldastaryn Konstitýtsiianyń 30 jyldyǵymen jáne jańa ambýlatoriianyń ashylýymen quttyqtady.
– Bul aýylda 43 jyl turamyn. Búgingi kún erekshe ári tolǵandyrarlyq sát, – dedi Dúisembai Úrimbaev.
Jańa ǵimarattyń qurylys jumystarynyń barysy turaqty túrde halyq qalaýlylarynyń baqylaýynda boldy.
– Mundai meditsinalyq nysandar – dárigerlik ambýlatoriialar men meditsinalyq pýnktter – óńirde sońǵy úsh jylda belsendi túrde salynyp keledi. Josparlanǵan 36 nysannyń 34-iniń qurylysy aiaqtaldy. Qyrkúiek aiynda qalǵandarynyń da qurylysy tolyq bitedi dep josparlap otyrmyz, – dedi «AMANAT» partiiasy ShQOF tóraǵasynyń orynbasary Amanbai Núrkenov.
«Aýyldyq densaýlyq saqtaýdy jańǵyrtý» baǵdarlamasy aiasynda boi kóterip jatqan nysandar meditsinalyq qural-jabdyqtarmen jáne jihazdarmen tolyq jabdyqtalýymen erekshelenedi. Bul halyqtyń densaýlyǵyn nyǵaitýǵa, ýaqytyly aldyn alý sharalaryn júrgizýge jáne skriningtik tekserýler ótkizýge úlken múmkindik beredi.
Shyǵys Qazaqstan oblysynda densaýlyq saqtaý salasyn jańǵyrtý qarqyndy túrde jalǵasýda. Bul rette basty nazar – kadr, tehnologiia jáne infraqurylym máselelerine aýdarylýda. Biyl maýsym aiynda ShQO ákimi Nurymbet Saqtaǵanov meditsina salasyn óńir damýynyń basty basymdyqtarynyń biri retinde atap ótken bolatyn.
– Meditsina – únemi damyp otyratyn sala. Dárigerler sońǵy ǵylymi jetistikterdi halyq igiligine jaratyp, el densaýlyǵyna paidalanýy mańyzdy. Jańa zaman meditsina qyzmetkerinen tek kásibilik pen jaýapkershilik qana emes, únemi damý, jańa tehnologiialardy engizý talap etiledi, – degen bolatyn óńir basshysy Nurymbet Saqtaǵanov.
