ShQO ata-analary balalardy vaktsinatsiialaýdyń mańyzy jaiynda aitty
– Biz joldasymyz ekeýmiz balalardy vaktsinatsiialaýdy jón dee taptyq. Óitkeni ata-ana retinde bizdiń mindetimiz-olardy barynsha qaýipsizdendirý, – dep atap ótti Óskemen qalasynyń № 39 orta mektebiniń direktory Gúlmira Abiýrova. – Búgingi tańda meniń balalarym vaktsina aldy. Eshqandai janama keri áserler bolǵan joq. Ata-analardy durys tańdaý jasaýǵa shaqyramyn. Sonda ǵana biz qalypty ómirge oralamyz.
Degenmen ǵalamtor keńistiginde kóptegen qarama-qaishy aqparattardy kezdestirýge bolady. Ol qanshalyqty shynaiy? Kúmándi bul suraqqa tek sarapshylar ǵana jaýap bere alatyndyǵyn atap óteiik.
– Biz muǵalimderdi de, ata-analardy da tolǵandyrǵan suraqtarǵa jaýap berý úshin mamandardy mektebimizge shaqyrdyq,-dedi Óskemendegi № 19 orta mekteptiń direktory Qairat Kiikbaev. – Túsindirmeni alǵannan keiin, basym bóligi vaktsina alýǵa bel býdy. Onyń ishinde meniń 17 jasar ulym da bar. Vaktsinatsiia densaýlyqty saqtaýdyń jalǵyz mehanizmi dep sanaimyn. Bizdiń mektepte muǵalimderdiń júz paiyzy egildi.
Esterińizge sala keteiik, jasóspirimderdi vaktsinatsiialaýǵa ata-analardyń nemese olardyń zańdy ókilderiniń jazbasha kelisimimen ǵana bilim berý uiymdarynyń meditsinalyq kabinetterinde jáne emhanalar janyndaǵy vaktsinatsiia ortalyqtarynda ruqsat etiledi. Profilaktikalyq egýdi júrgizý aldynda dáriger balaǵa meditsinalyq tekserý júrgizedi. Immýndaýǵa qarsy kórsetilimder bolmaǵan jaǵdaida egiletin adamnyń meditsinalyq qujatynda vaktsinatsiia júrgizýge ruqsatty resimdeidi. Oǵan nemese onyń zańdy ókiline alynatyn vaktsina, immýndaýdan keiingi yqtimal reaktsiialar týraly tolyq jáne obektivti aqparat beredi.
«Men vaktsinatsiia balalar úshin óte mańyzdy dep sanaimyn» dep oiyn bólisti ata-analardyń biri Oksana Goncharova, «Virýs barlyq jerde bar jáne ol juqpaly. Meniń ulym koronavirýstyq infektsiiaǵa qarsy ekpe jasady. Ol ózin jaqsy sezinedi, esh shaǵymdar joq. Meniń oiymsha, barlyq ata-analar bul másele týraly muqiiat oilanyp, durys sheshim qabyldaýy kerek».
ShQO densaýlyq saqtaý basqarmasynyń málimetinshe, óńirde 20 myńnan astam adam Pfizer Comirnaty vaktsinasymen egildi.
