Búgin tańerteń Shyǵys Qazaqstan oblysynyń dárigerleri jolda qalǵan jas ana men balaǵa tikushaqpen attandy. Qarǵyn sýdyń saldarynan keibir baǵyttaǵy joldarda avtokólik qatynasy ýaqytsha toqtatylǵan, dep habarlaidy Dalanews.kz Altainews.kz saityna silteme jasap.
Naqty aitqanda, tasqyn sýdyń jolǵa jaiylýynan kesheli beri Qalbataý-Maiqapshaǵai respýblikalyq trassasynyń Abai oblysy, Kókpekti aýdanyna qarasty aýmaǵyndaǵy ýchaskesi jabylyp, kólikterdiń júrýi shektelgen bolatyn.
Oblystyq densaýlyq saqtaý basqarmasynyń habarlaýynsha, 26 naýryz kúni Óskemendegi Ana men bala ortalyǵyna Tarbaǵatai aýdanynan 22 jastaǵy aiaǵy aýyr áiel jatqyzylǵan. Ortalyqtyń perzenthana dárigerleri jas anany kesar tiligi arqyly aman-esen bosandyryp alǵan.
Keshe, 1 sáýirde ana men sábii úige shyǵarylǵan. Alaida jas bosanǵan ana men sábii úiine jete almai Kókpekti aýdanynyń Tassai aýylynda aialdaýǵa májbúr bolǵan. Óitkeni bul óńirde qarǵyn sý joldardy basyp, avtokólikpen qatynaý múmkin emes edi.
- Aýa raiynyń qolaisyzdyǵyna bailanysty jolda qalǵan jas anany oblys ortalyǵyna jetkizý qajet degen habar kelip tústi. Ana men balanyń jaǵdaiy qalypty. Degenmen operatsiiadan keiingi asqynýlardyń aldyn alý úshin jáne jańa týǵan nárestege tiisti kómek kórsetý úshin búgin tań sáriden tikushaqpen Tassai aýylyna ushqaly turmyz. Ana men balasyn Óskemenge jetkizip ary qarai osy jerde kómek kórsetemiz. Anasyn oblystyq aýrýhanaǵa, al náresteni Ana men bala ortalyǵyna aparamyz, - dedi nómiri tórtinshi qalalyq aýrýhananyń bólimshe meńgerýshisi, reanimatolog-dáriger Rim Meńdibaev.
ShQO ákimi apparatynyń aviatsiialyq bólimshesiniń tikushaqtary osyndai qysyltaiań sátterde, ásirese adamdardyń ómiri men qaýipsizdigin qamtamasyz etý maqsatynda, naýqastarǵa shuǵyl kómek qajet bolǵanda qoldanylady. Aitalyq, biyl qańtarda Marqakól aýdanynda qar qalyń jaýyp, tabiǵi sipattaǵy tótenshe jaǵdai jariialanǵan kezde aýyl turǵyndaryna azyq-túlik pen dári-dármek tikushaqpen jetkizilgen bolatyn. Sol siiaqty qolaisyz aýa raiyna bailanysty Marqa óńirinde kólik qatynamai qalǵanda Tósqaiyń aýylynyń 72 jastaǵy naýqas turǵyny oblys ortalyǵyna áýe kóligimen jetkizilgen-di.
Budan bólek aqpannyń aq tútek boranynda Kókpekti aýdany aýmaǵynda jolda qalǵan jolaýshylardy qutqarǵanda, Kúrshim aýdanynyń Maraldy aýyldyq okrýginde boranda joǵalyp ketken eki adamdy izdegende, elektr jelisi isten shyǵyp, birneshe eldi meken elektr qýatynsyz qalǵanda jáne basqa da tótenshe jaǵdailarda arnaiy mamandardan jasaqtalǵan brigadany dittegen jerge osy tikushaqtar jetkizip otyrǵanyn aita ketý kerek.
