شقو اكىمدىگى جولدا قالعان انا مەن بالاعا تىكۇشاقپەن دارىگەر جىبەردى

Dalanews 03 ءساۋ. 2024 07:18 1839

بۇگىن تاڭەرتەڭ شىعىس قازاقستان وبلىسىنىڭ دارىگەرلەرى جولدا قالعان جاس انا مەن بالاعا تىكۇشاقپەن اتتاندى. قارعىن سۋدىڭ سالدارىنان كەيبىر باعىتتاعى جولداردا اۆتوكولىك قاتىناسى ۋاقىتشا توقتاتىلعان، دەپ حابارلايدى Dalanews.kz Altainews.kz  سايتىنا سىلتەمە جاساپ.

ناقتى ايتقاندا، تاسقىن سۋدىڭ جولعا جايىلۋىنان كەشەلى بەرى قالباتاۋ-مايقاپشاعاي رەسپۋبليكالىق تراسساسىنىڭ اباي وبلىسى، كوكپەكتى اۋدانىنا قاراستى اۋماعىنداعى ۋچاسكەسى جابىلىپ، كولىكتەردىڭ ءجۇرۋى شەكتەلگەن بولاتىن.

وبلىستىق دەنساۋلىق ساقتاۋ باسقارماسىنىڭ حابارلاۋىنشا، 26 ناۋرىز كۇنى وسكەمەندەگى انا مەن بالا ورتالىعىنا تارباعاتاي اۋدانىنان 22 جاستاعى اياعى اۋىر ايەل جاتقىزىلعان. ورتالىقتىڭ پەرزەنتحانا دارىگەرلەرى جاس انانى كەسار تىلىگى ارقىلى امان-ەسەن بوساندىرىپ العان.

كەشە، 1 ساۋىردە انا مەن ءسابيى ۇيگە شىعارىلعان. الايدا جاس بوسانعان انا مەن ءسابيى ۇيىنە جەتە الماي كوكپەكتى اۋدانىنىڭ تاسساي اۋىلىندا ايالداۋعا ءماجبۇر بولعان. ويتكەنى بۇل وڭىردە قارعىن سۋ جولداردى باسىپ، اۆتوكولىكپەن قاتىناۋ مۇمكىن ەمەس ەدى.

- اۋا رايىنىڭ قولايسىزدىعىنا بايلانىستى جولدا قالعان جاس انانى وبلىس ورتالىعىنا جەتكىزۋ قاجەت دەگەن حابار كەلىپ ءتۇستى. انا مەن بالانىڭ جاعدايى قالىپتى. دەگەنمەن وپەراسيادان كەيىنگى اسقىنۋلاردىڭ الدىن الۋ ءۇشىن جانە جاڭا تۋعان نارەستەگە ءتيىستى كومەك كورسەتۋ ءۇشىن بۇگىن تاڭ سارىدەن تىكۇشاقپەن تاسساي اۋىلىنا ۇشقالى تۇرمىز. انا مەن بالاسىن وسكەمەنگە جەتكىزىپ ارى قاراي وسى جەردە كومەك كورسەتەمىز. اناسىن وبلىستىق اۋرۋحاناعا، ال نارەستەنى انا مەن بالا ورتالىعىنا اپارامىز، - دەدى ءنومىرى ءتورتىنشى قالالىق اۋرۋحانانىڭ بولىمشە مەڭگەرۋشىسى، رەانيماتولوگ-دارىگەر ريم مەڭدىبايەۆ.

شقو اكىمى اپپاراتىنىڭ اۆياسيالىق بولىمشەسىنىڭ تىكۇشاقتارى وسىنداي قىسىلتاياڭ ساتتەردە، اسىرەسە ادامداردىڭ ءومىرى مەن قاۋىپسىزدىگىن قامتاماسىز ەتۋ ماقساتىندا، ناۋقاستارعا شۇعىل كومەك قاجەت بولعاندا قولدانىلادى. ايتالىق، بيىل قاڭتاردا مارقاكول اۋدانىندا قار قالىڭ جاۋىپ، تابيعي سيپاتتاعى توتەنشە جاعداي جاريالانعان كەزدە اۋىل تۇرعىندارىنا ازىق-تۇلىك پەن دارى-دارمەك تىكۇشاقپەن جەتكىزىلگەن بولاتىن. سول سياقتى قولايسىز اۋا رايىنا بايلانىستى مارقا وڭىرىندە كولىك قاتىناماي قالعاندا ءتوسقايىڭ اۋىلىنىڭ 72 جاستاعى ناۋقاس تۇرعىنى وبلىس ورتالىعىنا اۋە كولىگىمەن جەتكىزىلگەن-دى.

بۇدان بولەك اقپاننىڭ اق تۇتەك بورانىندا كوكپەكتى اۋدانى اۋماعىندا جولدا قالعان جولاۋشىلاردى قۇتقارعاندا، كۇرشىم اۋدانىنىڭ مارالدى اۋىلدىق وكرۋگىندە بوراندا جوعالىپ كەتكەن ەكى ادامدى ىزدەگەندە، ەلەكتر جەلىسى ىستەن شىعىپ، بىرنەشە ەلدى مەكەن ەلەكتر قۋاتىنسىز قالعاندا جانە باسقا دا توتەنشە جاعدايلاردا ارنايى مامانداردان جاساقتالعان بريگادانى دىتتەگەن جەرگە وسى تىكۇشاقتار جەتكىزىپ وتىرعانىن ايتا كەتۋ كەرەك.

 

 


ۇسىنىلعان
سوڭعى جاڭالىقتار
تەلە2 - باستىق1
22 ءساۋ. 2024 18:05
x