ShQO: 2025 jylǵa deiingi jol sapasyn jaqsartýdyń jobasy jasaldy
Ázirdiń ózinde jol sapasyn jaqsartýǵa baǵyttalǵan 12 joba júzege asyryla bastady. Bulardyń ishindegi eń mańyzdysy – Kúrshim aýdanynyń Buqtyrma sý qoimasynda salynatyn kópir bolmaq. Budan bólek Semeidegi kópir de kúrdeli jóndeýden ótedi.
Aldaǵy jyly Óskemen men Semeidi ainalyp ótetin avtokólik jolynyń qurylys bastalady. Óskemendi ainalyp ótetin jol qurylysyna 500 mln teńge bólinse, Semeidi ainalyp ótetin tas jolǵa 1 mlrd teńge baǵyttalmaq.
Óskemen men Semeidiń arasyndaǵy jol sapasy syn kótermeitinin turǵyndar talaidan beri aityp júr. Keler jyldan bastap eki iri qalany bailanystyratyn kúre jolǵa kúrdeli jóndeý jumystary júrgiziledi. Osy maqsatqa 5 mlrd teńge bólingen.
Budan syrt Reseimen bailanysty joldar da jóndeledi. Borodýliha aýdanyndaǵy Jezkent keden beketiniń kireberisi de jóndeý kórmegeli kóp bolǵan. Biyl bul másele de sheshimin tappaq.
2023 jyly Óskemen - Shemonaiha joly jóndeýden ótedi. Budan bólek aýdandy syrt ainalyp ótetin jol salynbaqshy, ázir bul másele talqylaný ústinde.
Keler jyly Qaraǵandy - Aiagóz - Tarbaǵatai - Buǵaz tas joly da jóndeý kóredi, buǵan 2 mlrd teńge bólingen.
Aýdan aýyl arasyndaǵy joldarǵa az-kem jóndeý jumysy júrgizilmek. Atap aitar bolsaq, Kúrshim - Qaljyr jolynyń 60-shy jáne 75-shi shaqyrymy, Kókpekti aýdanynan Sarybel aýylyna qara jol, Shar aýdanyndaǵy joldar, Qaton-Qaraǵai aýdanyndaǵy birqatar aýyldyń tas jolyna jóndeý jumysy jasalady.
Oblys basshylyǵy biylǵy jyly Semeidegi kóshe aralyq joldy retke keltirýdi myqtap qolǵa almaq, bul maqsatqa 1 mlrd teńge bólingen. Al Óskemen qalasynda bes birdei jol ýchaskisi ýaqytsha jabylyp, tramvai joldaryn qaita qalpyna keltirý sharalary iske asady. Buǵan 856 mln teńge baǵyttalyp otyr.
Jol qaýipsizdigi tek munymen shektelmesi anyq. Osyny eskergen oblys basshylyǵy jol boiyna jyldamdyqty esepke alatyn kameralardy kóptep ornatpaqshy. Jaiaý júrginshilerdiń qaýipsizdigi de basty nazarǵa alynǵan. Keler jyly Óskemen men Semei qalasynda eki birdei jer asty ótkeli paidalanýǵa beriledi. Buǵan biýdjetten 150 mln teńge bólingen.
