Shomylý maýsymynda qaýipsizdikti saqtańyz!
Oblystyń sýǵa batý oqiǵalary jii oryn alatyn halyq tyǵyz ornalasqan Saryaǵash, Otyrar aýdandarynda ýaqytsha qutqarý beketi ashyldy. Búgin bul týraly OQO óńirlik kommýnikatsiialar qyzmetinde ótken brifingte Tótenshe jaǵdailar departamentiniń bólim bastyǵy Talǵat Dosaliev málimdedi.
Onyń aitýynsha, sýdaǵy jazataiym oqiǵalar bolýy múmkin qaýipti aimaqtardy anyqtaý boiynsha jumystar tolyq atqarylǵan. Barlyǵy 722 983 adam halqy bar 158 qaýipti aimaq anyqtalyp otyr.
– Jazataiym oqiǵalardy aldyn alý úshin qaýipti sý aidyndarynda sýǵa shomylýǵa tyiym salynǵandyǵyn eskertetin 200-den astam taqtaisha ornatyldy. Sonymen birge, úgit-nasihat jumystary kúsheitilgen túrde júrgizilýde. «Qaýipsiz jaz», «Jaz. Qaýipsizdik-2018» aktsiialary, reidter uiymdastyrylyp, «Jas Otan» jastar qanatynyń jáne «Bizben birge» kóshbasshylar mektebiniń 500-den asa eriktiler úgit-nasihat jumystaryna tartyldy. «Sýdaǵy qaýipsizdik» taqyryby boiynsha jadynama taratylyp, 167 bilbord ornatylǵan, – dedi Talǵat Serikuly.
Sondai-aq, jazǵy saýyqtyrý lagerlerdiń jumysy bastalysymen oblystyq bilim berý basqarmasymen birlesip, «Aqsý», «Mashat-Arasan» jáne «Tehnolog» lagerlerinde arnaiy dárister ótkizilip, olarǵa 680 bala jáne 65 qyzmetker qamtyldy. Sabaq barysynda «Sýdaǵy qaýipsizdik», «Alǵashqy meditsinalyq kómek kórsetý», «Turmystaǵy qaýipsizdik» taqyryptary qamtyldy. Sabaqtar jazǵy demalystyń sońyna deiin josparlanǵan.
