Syrdariia-Túrkistan memlekettik óńirlik tabiǵi parkinde eki jyldan beri qyzmet pen erekshe qorǵalýy tiis aǵashtardyń saýdasy qyzǵan. "Al olarǵa tosqaýyl bolatyn quzyrly organ kúngeide joq", - deidi ormanshylar.
Sebebi, park basshysynyń orynbasary oblys ákimi Ómirzaq Shókeevtiń kúieý balasy bolsa, park filialynyń direktory qazirgi Sozaq aýdany ákiminiń uly. Aty atalǵan ekeýi muny joqqa shyǵardy.
Abylaihan Shaldarov úsh jyl bul baqta ormanshy bolǵan. Aitýynsha, mundaǵy Qyzyl kitapqa engen torańǵyl men jide aǵashtary jappai qyrqylyp jatyr. Toǵaidy qorǵaýy tiis inspektorlar basshylardyń pármenimen aǵash saýdagerine ainalǵanyn aitqany úshin jyl basynda jumystan ketipti. Syrdariia-Túrkistan memlekettik óńirlik tabiǵi parki basshysynyń orynbasary men park filialy direktory kelgeli "ómirimiz, tipti tozaqqa ainaldy" dep kúiinedi ol.
Abylaihan Shaldarov, burynǵy ormanshy:
- 2018 jyldan beri osy eki kisi keldi. Polatov Nurjan men Ábdiqadyrov Aqyl degen. Ylǵi sonymen qyz ákep demalady. Bizdi shaqyryp alady: "Oibai, tez, qoi ákelińder, myna jerge shashlyk isteýimiz kerek. Koniak, kalian shegýimiz kerek". Ákelmeseń, ertesine seni zańmen jumystan shyǵarady.
Ormannan aqsha jasaýdyń tásili kóp eken. "Gazy joq, qysta kómiri qymbat Otyrar aýdanynda bir arba ǵana otyn satýǵa ruqsat beretin biletpen 100 arba otyn satylady", - deidi burynǵy qoryqshylar. Otyndy bylai qoiǵanda, Otyrarda jide men torańǵyldy qada qylyp, biznes jasaý úrdisi bar. Bir ǵana jide taldan 7 qada jasaýǵa bolady. Qada degenińiz, kesilip daiyndalǵan bórene. Jergilikti qara bazarda bir ǵana qadanyń baǵasy - 400 teńge.
Sonyń saldarynan erekshe qorǵalyp, jaiqalýy tiis orman qyp-qyzyl bizneske ainalyp, jaipalyp barady. "Ár túsken teńgeni aǵa ormanshynyń qaltasyna basyp, odan qalsa, Nurjan Polatov pen Aqyl Ábdiqadyrovtyń jynoinaǵyna salamyz" - dep ashynǵan ormanshylar osyny basshylarǵa aityp, basy bálege qalǵan.
Abylaihan Shaldarov, burynǵy ormanshy:
- "E, mynaý ne desem», Nurjan Polatovtyń aitýy: «Oibai, Abylai, seniń sharýań bolmasyn, myna jumystan ket, men seni istetpeimin, shyq, boldy, ary qarai eńbek qorǵaý bólimine jazasyń ba, qarjy politsiiasyna jazasyń ba, prokýratýraǵa jazasyń ba, men ózim sheship alamyn". "Qazir, Abylai, tanys sheshedi". Aqyldyń aitýy da sol: "Meniń qaiyn aǵam turǵanda, eshkim eshteńe istei almaidy" - deidi.
Syrdariia-Túrkistan saiabaǵy basshysynyń orynbasary Aqyl Ábdiqadyrov degen oblys basshysy Ómirzaq Shókeevtiń týǵan kúieý balasy, al filial direktory Nurjan Polatov Otyrar aýdanyna talai jyl ákim bolǵan, qazir Sozaq aýdanynyń ákimi Salyhan Polatovtyń uly. Parktegi bylyqty áshkereleý úshin burynǵy ormanshylar men aýdan turǵyndary biyl politsiia men aýmaqtyq inspektsiia ókilderin ertip reid jasaǵan eken.
"Júzdegen aǵashtyń shabylǵany anyqtalǵanymen, sol kúii shara qoldanylmady" - deidi turǵyndar.
Beibit Syzdyqov, Otyrar aýdanynyń turǵyny:
- Oblys prokýroryna, biraq oblys prokýrory tabiǵatty qorǵaý prokýroryna jiberdi, tabiǵatty qorǵaý prokýrory komitetke jiberdi, komitet Qalymbetovke jiberdi, qaityp Qaiyrbekovke keldi. Sonymen, ne tekserilmeidi, ne qoimaidy.
Saiabaqty saýyq-sairan ornyna ainaldyrdy dep aiyptalǵan basshylardy izdep Túrkistanǵa bardyq. Nurjan Polatov ornynda joq. Hatshysy onyń syrqattanǵanyn aitsa, qyzmetkeri "jumys babymen reidte júr" dep shatasty. Esesine, oblys ákimi Ómirzaq Shókeevtiń kúieý balasy kezdesýden qashpady.
"Ormanshylardyń ózi qylmyspen ainalysyp júrgen soń, qyzmetke kele sala, tártipke keltiremiz dep, unamai qaldyq"- deidi Aqyl Ábdiqadyrov.
Aqyl Ábdiqadyrov, Syrdariia-Túrkistan memlekettik óńirlik tabiǵi parki KMM bas direktorynyń orynbasary:
- Aǵash shaptyrý,demalý, qoi soidyrý dei me...
- Qyzdarmen demalý degen siiaqty...
- Joq, qyzdar joq ol jerde. Sonyń bári jala. Óitkeni ondai tirlik bolmaǵan. Jala-jabý, ar-namys taptaý kóp qoi ol jerde. Ózimiz ol jerde zańmen sheshemiz ǵoi.
Basshy endi óz qyzmetkerlerin sotqa bermekshi. Al "qai jaqqa jazsaq ta, ádildik tappadyq" degen ormanshylar Túrkistan oblysynda toǵaida bolyp jatqan kóleńkeli bizneske tosqaýyl qoiar eshkimniń joǵyna senimdi. Sondyqtan astanadaǵylar kórip, aq-qarasyn aitar dep úmittenedi.
https://youtu.be/oiXFYqId8nM
