Shymkent qalalyq aýyl sharýashylyǵy jáne veterinariia basqarmasynyń basshysy Ábýnasyr Janbatyrov qyzmetinen ketti, dep habarlaidy Dalanews.kz.
Bul týraly eks-sheneýnik Facebook paraqshasynda jazdy. Ol otstavkaǵa ketý týraly ótinishti erikti túrde bergen.
Olai bolsa Shymkenttiń bas mal dárigeri qandai oqiǵalarmen tanymal bolǵanyn eske túsireiik.
2023 jyly Shymkentte qańǵybas janýarlar aýlanatyn orynda bolǵan jantúrshigerlik jaǵdai áleýmettik jelide daý týdyrǵan bolatyn. Osy tusta Ábýnasyr Janbatyrov qatty synǵa ushyrady.
Naqtyraq aitsaq, Qazaqstandaǵy janýarlardy qorǵaý qaýymdastyǵy Instagram paraqshasynda basy men aiaqtaryn shaýyp tastaǵan ondaǵan mysyqtyń sýretterin jariialaǵan edi. Sonymen qatar kadrda qatygezdikpen óltirilgen mysyqtardyń birneshe sýreti de taraldy.
Budan soń aýyl sharýashylyǵy jáne veterinariia basqarmasynyń basshysy aýlanǵan janýarlardy ýaqytsha ustaý pýnktine barady. Alaida Janbatyrov jýrnalisterdiń “jantúrshigerlik kóriniske kim kináli, qańǵybas mysyqtar men itterdi nemen qorektendiredi” degen suraqtaryna jaýap bere almaidy.
Ol tek jumysqa salǵyrt qaraǵan veterinar men úsh it aýlaǵysh jumystan bosatylǵanyn aitqan.
Eske salaiyq, kúni keshe Shymkent ákimdiginde ótip jatqan otyrys barysynda turǵyn úi basqarmasy basshysynyń mindetin atqarýshy ustalǵan bolatyn. Antikordyń aldyn ala málimetinshe sheneýnik 120 million teńge shyǵyn keltirdi degen kúdikke ilingen.
Al Shymkent qalasynyń ákimi Ǵabit Syzdyqbaev ár memlekettik qyzmetshi óz qyzmetinde aldymen halyqtyń igiligin oilap, soǵan súiene sheshim qabyldaýy kerek ekenin atap ótti.
"Ákimdik qyzmetkerleriniń arasynda adal jumys isteitinder kóp, biraq satqyndar da bar, men sizderge talai ret eskerttim", - degen ákim basqa amalynyń qalmaǵanyn aitqan bolatyn.
Osy tusta oqiǵaǵa kýá bolǵan biraz sheneýniktiń abdyrap qalǵany ras. Bálkim, Ábýnasyr Janbatyrov ta kópshilik aldynda masqaraǵa qalmai, qoǵamdyq alańnan aldyn ala ketýdi josparlaǵan bolar.Kim bilsin?!
