Shymkentte zańsyz kóshi-qon arnasyn uiymdastyrdy degen kúdikpen qylmystyq is aiasynda ondaǵan tintý júrgizildi, dep habarlaidy Dalanews.kz.
Ishki ister ministrliginiń málimetinshe, prokýratýranyń úilestirýimen júrgizilgen jedel is-sharalar barysynda el aýmaǵyna shetel azamattaryn zańsyz kirgizip, olardy zańsyz jolmen zańdastyrýmen ainalysqan turaqty qylmystyq toptyń áreketine tosqaýyl qoiylǵan.
Tergeý deregine sáikes, kúdiktiler aqshalai syiaqy úshin sheteldikterdiń Qazaqstanǵa kelýin uiymdastyryp, olardyń el aýmaǵynda zańsyz júrýine jaǵdai jasaǵan.
Arnaiy operatsiia kezinde 28 tintý sharasy júrgizilip, nátijesinde ondaǵan sheteldik pasport, keńse tehnikasy, bailanys quraldary, túrli blankiler men jalǵan eńbek kelisimsharttary tárkilengen.
Sonymen qatar iri kólemdegi aqsha qarajaty men tirkeýde joq qarý da alynǵan.
Vedomstvo málimetinshe, qylmystyq toptyń uiymdastyrýshysy ýaqytsha ustaý izoliatoryna qamaldy. Al atalǵan zańsyz arnaǵa qatysy bar 13 adam politsiia bólimshesine jetkizilgen.
Qazirgi tańda kúdiktilerge qatysty Qylmystyq kodekstiń zańsyz kóshi-qondy uiymdastyrý babymen sotqa deiingi tergeý bastaldy.
