Shymkentte ideologiialyq turǵydan eskirgen 236 kósheniń ataýy ózgeredi, dep habarlaidy Dalanews.kz.
“Qalada ataýsyz qalǵan 32 kóshe men ideologiialyq turǵydan eskirgen 236 kóshe ataýy bar. Bul ataýlar qoǵamdyq pikir eskerile otyryp, kezeń-kezeńimen ózgeredi”, – delingen habarlamada.
Mádeniet, tilderdi damytý jáne arhivter basqarmasy men aýdan ákimdikteri birlesip júrgizgen túgendeý jumystary nátijesinde Shymkent qalasynda resmi tirkelgen 3545 kóshe anyqtalǵan. Olardyń ishinde 2444 kóshe tarihi-geografiialyq jáne dástúrli ataýǵa ie, al 1069 kóshe belgili tulǵalardyń esimimen atalǵan.
Alaida jolaýshylar kóligi jáne avtomobil joldary basqarmasynyń málimetinshe, qalada jalpy sany 6714 kóshe bar.
2024 jyly 185 kóshege ataý berý jáne qaita ataý usynylǵan. Onyń ishinde 12 kóshe ataýyn ózgertýge qoǵamdyq kelisim alynǵan. Sondai-aq Uly Jeńistiń 80 jyldyǵyna orai 20 belgili tulǵanyń esimi kóshelerge berilmek, olardyń 10-y qoǵam tarapynan qoldaý tapqan.
"Biyl qala kóshelerine 35 753 ataý taqtaishasyn ornatý josparlanyp otyr. Sebebi burynǵy taqtaishalardyń kópshiliginde úi nómirleri kórsetilmegen nemese múlde jaramsyz kúide", – delingen habarlamada.
Sonymen qatar memlekettik tildiń qoldaný aiasyn keńeitý maqsatynda 2029 jylǵa deiin qazaq tilin meńgergen halyqtyń úlesi 93,5 paiyzǵa jetedi dep josparlanǵan. Qazirgi ýaqytta bul kórsetkish 98 paiyzǵa jetip otyr.
"Oǵan qosa, til týraly zańnamanyń oryndalýyn baqylaý maqsatynda monitoringter men reidter ótkizilip jatyr. Kásipkerlik nysandardyń 16 180-y tekserilip, 2 380 nysan iesine zań buzýshylyqtardy túzetý jóninde usynystar berildi. Qazirgi ýaqytta olardyń 120-sy zań talaptaryna sai túzetildi, qalǵandary boiynsha jumystar jalǵasyp jatyr", – dep tolyqtyrdy ákimdik.
