Belgili jýrnalist Mihail Kozachkov telegram arnasynda Shymkentte UQK departamenti bastyǵynyń orynbasary Manat Sarbasovqa qatysty tergeý amaldarynyń júrgizilip jatqanyn málimdedi, dep habarlaidy Dalanews.kz
Ulttyq qaýipsizdik komitetiniń basshysynyń orynbasaryna "Laýazymdy ókilettigin asyra paidalaný" baby boiynsha aiyp taǵylǵan. Ol uzaq ýaqyt boiy jergilikti sheneýnikterge qamqorlyq tanytyp, olardan para alyp kelgen kórinedi. Jýrnalist osy máselege qatysty negizigi úsh epizodty atap ótedi.
"Birinshi epizod Shymkent qalasy ákiminiń burynǵy orynbasary Maqsut Isahovpen bailanysty. 2023 jyly shildede sheneýnikti jergilikti Ulttyq qaýipsizdik departamentiniń qyzmetkerleri ustaǵan bolatyn. Ol asa iri kólemde (200 myń dollarǵa jýyq) para bermek bolǵan. Jaqynda Isahovtyń isi 367-baptyń 4-bóligi "asa iri kólemde para berý" boiynsha sotqa ótti. Alaida atalmysh qarjyny kimge bermek bolǵany ázirge belgisiz", - deidi jýrnalist.
Al ekinshi epizod Shymkent qalalyq Ulttyq qaýipsizdik departamentiniń burynǵy tergeýshisi Erjan Masaqbaevtyń qylmystyq isine qatysty eken.
"Ol biyl jazda alaiaqtyq jasap, para berýge itermeledi degen aiyppen sottalǵan bolatyn. Iaǵni, jekemenshik mektep iesinen 173 million teńge alǵan. Nátijesinde 12 jylǵa bas bostandyǵynan aiyryldy. Alaida ol bul isti jalǵyz jasamaǵan. Basshylyqpen birlesip jasaýy múmkin degen kúmán bar" - dep sózin jalǵady jýrnalist.
Úshinshi epizod boiynsha Shymkent qalasy bilim salasyna jaýapty sheneýnikterden para alǵany tekserilip jatyr.
"Derekkóz málimetterine sáikes, Manat Sarbasovqa birneshe jyl boiy jarty milliard teńgege jýyq aqsha berilgen kórinedi. Muny para bergen sheneýnikterdiń ózderi moiyndaǵan kórinedi" - dep qorytyndylady jýrnalist.
Qazirgi tańda Sarbasovtyń isin UQK-niń ózindik qaýipsizdik basqarmasy júrgizip jatyr. Olar jemqor sheneýnikterdi shetinen tazartýǵa kóshken. Alaida ázirge Kozachkovtyń jazǵan bul faktilerin resmi organdar rastaǵan joq.
