بەلگىلى جۋرناليست ميحايل كوزاچكوۆ تەلەگرام ارناسىندا شىمكەنتتە ۇقك دەپارتامەنتى باستىعىنىڭ ورىنباسارى مانات سارباسوۆقا قاتىستى تەرگەۋ امالدارىنىڭ جۇرگىزىلىپ جاتقانىن مالىمدەدى، دەپ حابارلايدى Dalanews.kz
ۇلتتىق قاۋىپسىزدىك كوميتەتىنىڭ باسشىسىنىڭ ورىنباسارىنا "لاۋازىمدى وكىلەتتىگىن اسىرا پايدالانۋ" بابى بويىنشا ايىپ تاعىلعان. ول ۇزاق ۋاقىت بويى جەرگىلىكتى شەنەۋنىكتەرگە قامقورلىق تانىتىپ، ولاردان پارا الىپ كەلگەن كورىنەدى. جۋرناليست وسى ماسەلەگە قاتىستى نەگىزىگى ءۇش ەپيزودتى اتاپ وتەدى.
"ءبىرىنشى ەپيزود شىمكەنت قالاسى اكىمىنىڭ بۇرىنعى ورىنباسارى ماقسۇت يساحوۆپەن بايلانىستى. 2023 جىلى شىلدەدە شەنەۋنىكتى جەرگىلىكتى ۇلتتىق قاۋىپسىزدىك دەپارتامەنتىنىڭ قىزمەتكەرلەرى ۇستاعان بولاتىن. ول اسا ءىرى كولەمدە (200 مىڭ دوللارعا جۋىق) پارا بەرمەك بولعان. جاقىندا يساحوۆتىڭ ءىسى 367-باپتىڭ 4-بولىگى "اسا ءىرى كولەمدە پارا بەرۋ" بويىنشا سوتقا ءوتتى. الايدا اتالمىش قارجىنى كىمگە بەرمەك بولعانى ازىرگە بەلگىسىز"، - دەيدى جۋرناليست.
ال ەكىنشى ەپيزود شىمكەنت قالالىق ۇلتتىق قاۋىپسىزدىك دەپارتامەنتىنىڭ بۇرىنعى تەرگەۋشىسى ەرجان ماساقبايەۆتىڭ قىلمىستىق ىسىنە قاتىستى ەكەن.
"ول بيىل جازدا الاياقتىق جاساپ، پارا بەرۋگە يتەرمەلەدى دەگەن ايىپپەن سوتتالعان بولاتىن. ياعني، جەكەمەنشىك مەكتەپ يەسىنەن 173 ميلليون تەڭگە العان. ناتيجەسىندە 12 جىلعا باس بوستاندىعىنان ايىرىلدى. الايدا ول بۇل ءىستى جالعىز جاساماعان. باسشىلىقپەن بىرلەسىپ جاساۋى مۇمكىن دەگەن كۇمان بار" - دەپ ءسوزىن جالعادى جۋرناليست.
ءۇشىنشى ەپيزود بويىنشا شىمكەنت قالاسى ءبىلىم سالاسىنا جاۋاپتى شەنەۋنىكتەردەن پارا العانى تەكسەرىلىپ جاتىر.
"دەرەككوز مالىمەتتەرىنە سايكەس، مانات سارباسوۆقا بىرنەشە جىل بويى جارتى ميلليارد تەڭگەگە جۋىق اقشا بەرىلگەن كورىنەدى. مۇنى پارا بەرگەن شەنەۋنىكتەردىڭ وزدەرى مويىنداعان كورىنەدى" - دەپ قورىتىندىلادى جۋرناليست.
قازىرگى تاڭدا سارباسوۆتىڭ ءىسىن ۇقك-نىڭ وزىندىك قاۋىپسىزدىك باسقارماسى جۇرگىزىپ جاتىر. ولار جەمقور شەنەۋنىكتەردى شەتىنەن تازارتۋعا كوشكەن. الايدا ازىرگە كوزاچكوۆتىڭ جازعان بۇل فاكتىلەرىن رەسمي ورگاندار راستاعان جوق.
