Shymkentte úndistandyq stýdetke tiisip, telefonyn tartyp alǵan bazar kúzetshisi jazalandy, dep habarlaidy Dalanews.kz.
Shymkent qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda H.-ǵa qatysty ÁQBtK-niń 434-babynyń 1-bóligimen (usaq buzaqylyq, qoǵamdyq oryndarda bylapyt sóileý, jeke tulǵalarǵa zábirlep tiisý jáne ainalasyndaǵylarǵa qurmetpen qaramaýdy bildiretin, qoǵamdyq tártip pen jeke tulǵalardyń tynyshtyǵyn buzatyn basqa da osyndai áreketter) ákimshilik is qaraldy.
Sotta anyqtalǵany:
H. 2026 jyldyń qańtar aiynyń 11 kúni qalanyń «Qyrǵy bazarynda» Úndi Respýblikasynyń azamaty S.-ny dóreki sózdermen balaǵattap, uialy telefonyn qolynan julyp alyp, qoǵamdyq orynda mazasyn alyp qoǵamdyq ortany syilamaýshylyq tanytqan.
Taraptardyń pozitsiiasy:
H. sotta óz kinásin moiyndap, ókinetinin sottan ózine qatań jaza taǵaiyndamaýyn surady.
Jábirlenýshi keshirim bergenin, aralarynda eshqandai arazdyqtyń joq ekendigin kórsetti.
Sot ne úshin jáne qandai sheshim qabyldady:
Quqyq buzýshynyń kinási is-qujattarymen qosa, óziniń bergen túsinigimen, ákimshilik quqyq buzýshylyq týraly hattamasymen jáne taǵy da basqa is boiynsha jinaqtalǵan qujattarmen tolyq dáleldenip, atalǵan mán-jailarǵa súiene otyryp, quqyq buzýshynyń jaýaptylyǵyn jeńildetetin mán-jailar onyń kinásin moiyndaǵanyn, ókingenin al, jaýaptylyqty aýyrlatatyn mán-jailar anyqtalmaǵanyn eskerip, sot H.-ny ÁQBtK-niń 434 babynyń 1-bóligimen kináli dep tanyp, oǵan 20 AEK mólsherinde aiyppul jazasyn taǵaiyndady.
Sot qaýlysy zańdy kúshine enbegen.
Eske salaiyq, oqiǵa Shymkenttegi «Qyrǵy bazarynda» bolǵan. Bazar kúzetshileri video túsirip turǵan úndistandyq stýdenttiń mazasyn alyp, oǵan shabýyl jasap, telefonyn tartyp alǵan. Politsiia bul aqparatty rastady.
