Arnaýly korreksıalyq qos bóbekjaı-balabaqsha jalpy 110 orynǵa laıyqtalǵan. Qos ǵımarat kásipker mesenat, «Qazaqstannyń 100 jańa esimi» jobasynyń jeńimpazy, oblystyq máslıhat depýtaty, «OTAÝ grýp» kompanıasynyń prezıdenti Qaırat Moldaseıitov demeýshiligimen salynǵan. Jobanyń jalpy quny 280 mln. teńgeni quraıdy.
Jańa ortalyqtyń ashylý saltanatynda alǵashqy bolyp sóz alǵan oblys ákimi Janseıit Túımebaev balǵyndarǵa arnalǵan arnaýly bóbekjaı-balabaqshalardyń ashylýymen qala turǵyndaryn turǵyndaryn quttyqtady.
– Búgin el ıgiligi úshin salynǵan áleýmettik nysandardyń birine kýá bolyp otyrmyz. Bul 60 jáne 50 oryndyq eki balabaqsha búginnen bastap el ıgiligi úshin paıdalanýǵa tapsyrylady. Onyń biri «Aıgerim» bóbekjaı-balabaqshasy– psıhıkalyq damýy shekteýli balalarǵa arnalady. Ekinshisi «Dostyq» bóbekjaı-balabaqshasy – tirek-qımyl fýnksıalary buzylǵan balalarǵa arnap salyndy. Osy bir taǵdyrdyń salǵanyna eriksiz moıynsynǵan jas jetkinshekterimiz úshin qol ushyn sozyp, kómek bergen Qaırat Quseıinulyna alǵysymyz sheksiz. Osyndaı qoldaý kórsetip, demeýshilik jasap júrgen kásipkerlerdiń eńbekteri ózgelerge úlgi bolarlyq shynaıy patrıotızmniń kórinisteri dep bilemin, – dedi Janseıit Túımebaev.
Ońtústikke «Rýhanı jańǵyrý» baǵdarlamasy aıasynda kásipkerler demeýshiligimen kóptegen áleýmettik nysandar salynyp, el ıgiligine berilýde.
Mundaı ıgilikti ister áli de jalǵasatyn bolady.
