Shymkent qalasynyń ákimi Murat Áitenovtiń tóraǵalyǵymen koronavirýstyń taralýynyń aldyn alý shtabynyń otyrysy ótti. Onda densaýlyq saqtaý salasynyń daiyndyǵy taǵy bir ret pysyqtady.
Ózderińizge belgili, qalada koronavirýspen kúrestiń 3 stsenariii ázirlengen bolatyn. Qazir A stsenariii boiynsha jumys júrgizilip jatyr. Bul stsenarii boiynsha 1380 tósek-oryn daiyn. B jáne S stsenariileri boiynsha 5 myń tósek-orynǵa deiin daiyndalady.
Qalada ÓJJ apparattary men ottegi, sonymen birge dári-dármek qory jetkilikti.
Qazirgi tańda densaýlyq saqtaý mekemelerinde 284 naýqas koronavirýspen em alyp jatyr. Tolymdylyq 20 paiyzdy quraidy. Odan bólek simptomsyz 133 naýqas úilerinde emdeý ústinde.
Shymkent qalasynda 29 naýryz kúni koronavirýspen 13 naýqas tirkeldi. Odan bólek, 2345 adam koronavirýs juqtyrǵandarmen qarym-qatynasta bolǵan. Olar tirkelgen emhanalardyń baqylaýynda. Mamandar qarym-qatynasta bolǵandarǵa kúndelikti habarlasyp, úide karantin rejimin saqtaý kerek ekenin eskertip aitýda. Alaida, soǵan qaramastan simptomsyz naýqastar men qarym-qatynasta bolǵandar syrtqa shyǵyp ketip jatqan jaǵdailar joq emes.
Qala ákimi Nur-Sultan jáne Almaty qalalarynda qalyptasqan epidemiologiialyq jaǵdaidy tilge tiek etip, qala turǵyndaryn betperde kiip júrýge, kópshilik oryndarǵa barmaýǵa, basqa da sanitarlyq talaptardy saqtap júrýge shaqyrdy. Sanitarlyq talaptardyń oryndalýyn qadaǵalaityn mobildi toptardyń jumysyn kúsheite túsýdi tapsyrdy.
Shymkent qalasy ákimdiginiń baspasóz qyzmeti
