Shymkentte «Naýryz tal» aktsiiasy ótti
Respýblikalyq «Eko-sana» qozǵalysynyń bastamashylyǵymen qolǵa alynǵan aktsiia aiasynda alleiada 1000 jyldyq Qyrym qaraǵaiynyń 42 kósheti otyrǵyzyldy. Bul jolǵy erekshelik, kez kelgen qaraǵaidy QR kod arqyly skanerlep, kóshet iesin anyqtaýǵa bolady. Odan bólek, aǵash iesine mobildi qosymsha arqyly ai saiyn sýarý týraly sms kelip otyrady.
Qala tazalyǵyna úles qosýdy dáriptegen aktsiiaǵa Shymkent qalasy ákiminiń birinshi orynbasary Shyńǵys Muqan, Shymkent qalasy máslihatynyń hatshysy Bahadyr Narymbetov bastaǵan depýtattar, Maira Muhamedqyzy, Zattybek Kópbosynuly, Aqbota Kerimbekova bastaǵan óner juldyzdary jáne ziialy qaýym ókilderi, jergilikti turǵyndar qatysty.
– Biylǵy Naýryzdyń orny bólek. Máselen, Reseide Jańa jyldy 31-shi jeltoqsannan 10-shy qańtarǵa deiin toilaidy. Nege bizge Ulystyń uly kúnin 10 kún toilamasqa degen oimen, 14 men 24-shi naýryz aralyǵyn ár kúnine jeke-jeke «at qoiyp, aidar taǵyp» atap ótip jatyrmyz. Tal egý – ata-babamyzdan qalǵan dástúr. Kóktem kele ainalamyzdy tazartyp, jyl basyna daiyndalamyz. Tal egip, bulaq kózin ashamyz. Bul aktsiia da osynaý igi is aiasynda ótýde. Táýelsizdiktiń 30 jyldyǵyna orai Memleket basshysy Qasym-Jomart Toqaevtyń tapsyrmasymen Áz-Naýryz merekesin on kún boiy, 14-24 naýryz aralyǵynda ár kúndi ózine tán ataýmen merekeleimiz. Jalpy, Shymkent qalasynyń ákimi Murat Áitenovtiń ideiasymen «Naýryz Shymkentten bastalady» mega jobasyn qolǵa aldyq. Óńirimizdiń tabiǵaty da buǵan sai kelip tur. Mundaǵy maqsat – tabiǵi jańa jyldy Shymkentte qarsy alý úrdisin bastap, úshinshi megapolistiń ózindik brendin qalyptastyrý, – dedi Shyńǵys Jumabekuly.
«Naýryz tal» aktsiiasyna Nur-Sultan men Almaty qalalarynan arnaiy shaqyrylǵan qonaqtar, ziialy qaýym ókilderi, qalalyq Ishki saiasat jáne jastar isteri jónindegi basqarmasynyń basshysy Mádi Manatbekuly jáne belsendi jastar jinaldy.
– Megapoliste merekege arnap ótkizilip jatqan is-sharalar «Naýryzǵa laiyqty mártebe bere almai júrmiz» degen olqylyqtyń ornyn toltyrady. Búgin Naýryzdyń Shymkentten bastalatynyna kýá boldyq, - dedi Abai TV telearnasynyń direktory Azamat Keńesuly.
Aita keteiik, «Naýryz tal» qalalyq aktsiiasy Qazaqstan Táýelsizdiginiń 30 jyldyǵyna arnalǵan «Qaiyrymdy ister marafony» jalpy ulttyq jobasy aiasynda uiymdastyryldy. Al aktsiia sońy kontserttik baǵdarlamaǵa ulasty.
Shymkent qalasynyń Aqparattyq-kommýnikatsiialyq ortalyǵy
Foto: Samat Myrzaliev
