Shymkentte muǵalim oqýshyny urǵany úshin 25 táýlikke qamaýǵa alyndy. Bul týraly qalalyq sottyń baspasóz qyzmeti málimdedi, dep habarlaidy Dalanews.kz.
Oqiǵa biyl naýryz aiynda litsei-mektepterdiń birinde bolǵan. Sabaq ótip jatqan kezde muǵalim esikti qatty qaqqan oqýshyǵa birneshe ret qol kótergen. Bul sát oqý ornynda ornatylǵan beinebaqylaý kamerasyna túsip qalǵan.
Aiyptalýshy óz kinásin moiyndap, sottan bostandyǵynan aiyrmaityn jeńil jaza taǵaiyndaýdy suraǵan.
Alaida sot er adamdy QR Qylmystyq kodeksiniń 109-1-baby boiynsha ("Kámeletke tolmaǵanǵa ádeii jeńil dene jaraqatyn keltirmei, dene aýyrtpalyǵyn salý") kináli dep tanyp, 25 táýlikke qamaý jazasyn kesti.
Sot úkimi ázirge zańdy kúshine engen joq.
Eske salaiyq, buǵan deiin Almatydaǵy Nazarbaev Ziiatkerlik mektebinde 11-synyp oqýshysynyń oqýdan shyǵarylýy qoǵamda qyzý pikirtalas týdyrǵan edi. 23 mamyrda mektep ákimshiligi jasóspirimdi tártip erejesin buzdy dep oqýdan shyǵarǵan. Keiinnen oqýshy videoúndeý jasap, kinásin moiyndap, keshirim surady.
Mektep usynǵan málimetke sáikes, qorytyndy baǵalaý kezinde oqýshy telefon qoldanǵan, muǵalim eskertý jasaǵanda, ustazǵa balaǵat sóz aitqan. Osy oqiǵadan keiin másele tártiptik keńeste qaralyp, oqýshyny mektepten shyǵarý týraly sheshim qabyldanǵan.
Jasóspirim jariialaǵan beineúndeýde óz áreketine ókinish bildirip, birneshe ret keshirim suraǵanyn aitady. Ol oqýyn sol mektepte jalǵastyrýǵa múmkindik berýdi surap, qajet bolsa, qoǵamdyq jumysqa tartylýǵa nemese ózge tártiptik sharalarǵa daiyn ekenin málimdegen. Sonymen birge, muǵalimder men ata-analar tarapynan ózine qatysty jalǵan aqparat taralǵanyn jetkizdi.
"Eger maǵan osy mektepte oqýymdy jalǵastyrýǵa múmkindik berilse, tártiptik jazaǵa da, qoǵamdyq jumysqa da daiynmyn", – dedi ol beineúndeýinde.
Oqýshynyń jaǵdaiy ýshyǵyp ketken soń, qoǵam belsendisi Aida Býkaeva onyń densaýlyǵy kúrt nasharlaǵanyn habarlady. Onyń aitýynsha, jasóspirim birneshe kún tamaq ishpei, júike júiesi syr bergen, tipti jedel járdemmen aýrýhanaǵa jetkizilgen.
